എറണാകുളം: കേരളത്തിലെ അർബൻ സഹകരണ ബാങ്കുകളുടെ അടിയന്തര യോഗം വിളിച്ചുചേർത്ത് റിസർവ് ബാങ്ക്. ഇന്ന് കൊച്ചിയിലാണ് യോഗം. കരുവന്നൂർ സഹകരണ തട്ടിപ്പിന്റെ പശ്ചാത്തലത്തിലാണ് അടിയന്തര യോഗം ആർബിഐ വിളിച്ചുചേർത്തിരിക്കുന്നത്. പ്രാഥമിക സഹകരണ ബാങ്കുകളുമായി അർബൻ ബാങ്കുകൾ മാനദണ്ഡങ്ങൾ മറികടന്ന് സഹകരിക്കുന്നുണ്ടോയെന്ന് അന്വേഷിക്കാൻ ഒരുങ്ങുന്നതിന് മുന്നോടിയായാണ് ബാങ്ക് പ്രതിനിധികളെ ഉൾപ്പെടുത്തിയുള്ള ഇന്നത്തെ യോഗം.
തട്ടിപ്പ് നടന്ന കരുവന്നൂർ ബാങ്കുമായി രണ്ട് അർബൻ ബാങ്കുകൾ ഇടപാട് നടത്തിയതായി ഇ.ഡി. കണ്ടെത്തിയിരുന്നു. ഇതിന്റെ പശ്ചാത്തലത്തിലാണ് മാനദണ്ഡങ്ങൾ അർബൻ ബാങ്കുകൾ പാലിക്കുന്നുണ്ടോയെന്ന് വിശദമായി പരിശോധിക്കാൻ ആർബിഐ ഒരുങ്ങുന്നത്.
കരുവന്നൂർ കള്ളപ്പണ കേസിൽ സഹകരണ സൊസൈറ്റി റജിസ്ട്രാർ ടി.വി. സുഭാഷിനെ ഇന്ന് ഇഡി ചോദ്യം ചെയ്യും. മുകുന്ദപുരം അസിസ്റ്റന്റ് രജിസ്ട്രാർ, തൃശൂർ ജോയിന്റ് രജിസ്ട്രാർ എന്നിവരെ ഇ.ഡി ചോദ്യം ചെയ്തിരുന്നു. കരുവന്നൂർ തട്ടിപ്പ് സഹകരണ വകുപ്പിലെ ഉന്നത ഉദ്യോഗസ്ഥർ അറിയാതെ നടക്കില്ലെന്നാണ് ഇഡിയുടെ നിഗമനം. ഇതിന്റെ പശ്ചാത്തലത്തിലാണ് സുഭാഷിനെ ചോദ്യം ചെയ്യാൻ വിളിപ്പിച്ചിരിക്കുന്നത്.
