തൃശൂർ: കരുവന്നൂർ സഹകരണ ബാങ്ക് തട്ടിപ്പ് കേസിൽ എൻഫോഴ്സ്മെന്റ് ഡയറക്ടറേറ്റിന്റെ ചോദ്യം ചെയ്യൽ തുടരുന്നു. കേസുമായി ബന്ധപ്പെട്ട് സഹകരണ വകുപ്പ് രജിസ്ട്രാർ ടി.വി. സുഭാഷ് ഐഎഎസിനെ ഇഡി ഇന്ന് ചോദ്യം ചെയ്യും. ചോദ്യം ചെയ്യലിന് ഹാജരാകണമെന്ന് ആവശ്യപ്പെട്ട് ടി വി സുഭാഷ് ഐഎഎസിന് നോട്ടീസ് നൽകിയിരുന്നു.
ഇന്നലെ ചോദ്യം ചെയ്യലിന് ഹാജരാകണമെന്ന് ആവശ്യപ്പെട്ടിരുന്നെങ്കിലും ടി.വി. സുഭാഷ് ഹാജരായിരുന്നില്ല. തലേ ദിവസം രാത്രിയാണ് നോട്ടീസ് ലഭിച്ചതെന്നും, അസൗകര്യമുണ്ടെന്നും ചൂണ്ടിക്കാട്ടിയാണ് ടിവി സുഭാഷ് ഇഡി ഓഫീസിൽ ഹാജരാകാതിരുന്നത്. എന്നാൽ ഇതോടെയാണ് ഇഡി രണ്ടാമതും നോട്ടീസ് നൽകിയത്.
ഓഡിറ്റിംഗിൽ ഉണ്ടായ വീഴ്ചകൾ സംബന്ധിച്ചും, കണ്ടെത്തലുകൾ സംബന്ധിച്ചും വ്യക്തത തേടിയാണ് സഹകരണ രജിസ്ട്രാറെ ചോദ്യം ചെയ്യുന്നത്. മുൻ കണ്ണൂർ കളക്ടറായിരുന്ന സുഭാഷ് 2022 ഏപ്രിലിലാണ് സഹകരണ രജിസ്ട്രാർ ആയി നിയമിതനായത്.
