കോൾ ഓഫ് ഡ്യൂട്ടി, വേൾഡ് ഓഫ് വാർ ക്രാഫ്റ്റ്, കാൻഡി ക്രഷ് എന്നീ ഗെയിമുകൾ മൈക്രോസോഫ്റ്റ് ഏറ്റെടുത്തു. ഈ ഗെയിമുകളുടെ പ്രസാധകരായ ആക്ടിവിഷൻ ബ്ലിസാർഡിനാണ് മൈക്രോസോഫ്റ്റ് ഏറ്റെടുത്തത്. 6870 കോടി ഡോളർ അതായത് 5.73 ലക്ഷം കോടി രൂപയ്ക്കാണ് ഉടമസ്ഥാവകാശം സ്വന്തമാക്കിയത്. ആക്ടിവിഷനെ ഏറ്റെടുക്കുന്നത് സംബന്ധിച്ച വിവരങ്ങൾ അടുത്തിടെ പുറത്തു വന്നിരുന്നു.
യുകെയിലേയും യുഎസിലേയും അധികൃതരുമായുള്ള ഏറെ നാൾ നീണ്ട പോരാട്ടങ്ങൾക്കൊടുവിലാണ് നടപടിക്രമങ്ങൾ പൂർത്തിയാക്കിയത്. ആക്ടിവിഷൻ ബ്ലിസാർഡിനെയും ടീമിനെയും എക്സ് ബോക്സിലേക്ക് സ്വാഗതം ചെയ്യുന്നതായി എക്സ്ബോക്സ് മേധാവി ഫിൽ സ്പെൻസർ അറിയിച്ചു. മൈക്രോസോഫ്റ്റ് ഇതുവരെ നടത്തിയിട്ടുള്ളതിൽ വെച്ച് ഏറ്റവും വലിയ ഇടപാടാണിത്.
2,600 കോടി ഡോളറിനാണ് മൈക്രോസോഫ്റ്റ് ലിങ്ക്ഡ് ഇൻ ഏറ്റെടുത്തത്. ഗെയിമിംഗ് കമ്പനിയായ ബത്തേഡ്സ ഏറ്റെടുത്തത് 750 കോടി ഡോളറിനായിരുന്നു. ഇപ്പോഴത്തെ നീക്കം ഗെയിമിംഗ് രംഗത്തേക്കുള്ള വലിയ ചുവടുവെയ്പ്പാണിത്. ബ്ലിസാർഡിന്റെ മാത്രം ഒമ്പതിലേറെ ഗെയിം സ്റ്റുഡിയോകളും കിംഗ് ഫ്രാഞ്ചൈസിയുടെ 11 സ്റ്റുഡിയോകളും മൈക്രോസോഫ്റ്റിന്റെ ഭാഗമാകും. ഇതിനൊപ്പം തന്നെ ആക്ടിവിഷന്റെ 8,500 ജീവനക്കാരും മൈക്രോസോഫ്റ്റിന്റെ ഭാഗമായി മാറും.
