ചെന്നൈ: ഇന്ത്യയുടെ അഭിമാന ചെസ് താരം ആർ. പ്രജ്ഞാനന്ദയുമായി കൂടിക്കാഴ്ച നടത്തി ഐഎസ്ആർഒ ചെയർമാൻ എസ്.സോമനാഥ്. ജിഎസ്എൽവി റോക്കറ്റിന്റെ മാതൃക അദ്ദേഹം പ്രഗ്നാനന്ദക്ക് ഉപഹാരമായി നൽകുകയും വരുന്ന മത്സരങ്ങളിൽ വിജയം ആശംസിക്കുകയും ചെയ്തു.
ഐഎസ്ആർഒ ശാസ്ത്രജ്ഞർക്കും ഗഗൻയാൻദൗത്യത്തിനും എല്ലാവിധ ആശംസകളും നേരുന്നതായി പ്രജ്ഞാനന്ദ പറഞ്ഞു. വിവിധ മത്സരങ്ങളിൽ നിന്നായി തനിക്ക് ലഭിച്ച സമ്മാനങ്ങളുംപ്രജ്ഞാനന്ദ എസ്.സോമനാഥിന് കാണിച്ചു കൊടുത്തു.
പ്രഗ്യാൻ റോവർ ഉറങ്ങുകയാണെങ്കിലും ഇന്ത്യയുടെ അഭിമാനം ഉയർത്താൻ പ്രജ്ഞാനന്ദ സജീവമാകണമെന്നും അദ്ദേഹം പറഞ്ഞു. പ്രജ്ഞാനന്ദ നേടിയ വിജയത്തിൽ അഭിമാനമുണ്ടെന്നും, വൈകാതെ തന്നെ ലോകത്തിലെ ഒന്നാം നമ്പർ താരമായി മാറാൻ അദ്ദേഹത്തിന് സാധിക്കട്ടെ എന്നും സോമനാഥ് ആശംസിച്ചു. ഭൂമിക്ക് പ്രജ്ഞാനന്ദയും ഐഎസ്ആർഒക്ക് ചന്ദ്രനിൽ പ്രഗ്യാനും ഉണ്ടെന്നും, ബഹിരാകാശത്തെക്കുറിച്ച് കൂടുതൽ ആളുകളിൽ അവബോധം സൃഷ്ടിക്കുന്നതിനായി പ്രജ്ഞാനന്ദ ഐഎസ്ആർഒയുമായി ചേർന്ന് പ്രവർത്തിക്കാൻ തീരുമാനിച്ചെന്നും സോമനാഥ് വ്യക്തമാക്കി.
ഐഎസ്ആർഒ ചെയർമാനെ കാണാൻ സാധിച്ചതിൽ വളരെ ഏറെ സന്തോഷമുണ്ടെന്നും, റോക്കറ്റ് വിക്ഷേപണ കേന്ദ്രമായ ശ്രീഹരികോട്ട സന്ദർശിക്കുവാൻ അദ്ദേഹം ക്ഷണിച്ചുവെന്നും ഐഎസ്ആർഒ നൽകിയ അംഗീകാരത്തിൽ അഭിമാനമുണ്ടെന്നും പ്രജ്ഞാനന്ദ പറഞ്ഞു.
