ന്യൂഡൽഹി: ട്രൈബൽ യൂത്ത് എക്സ്ചേഞ്ച് പ്രോഗ്രാമിന് കീഴിൽ വനവാസി യുവാക്കളുമായി കേന്ദ്ര ആഭ്യന്തരമന്ത്രി അമിത് ഷാ നാളെ സംവദിക്കും. ഡൽഹിയിലെ ഭാരത് മണ്ഡപത്തിലാണ് പരിപാടി സംഘടിപ്പിക്കുന്നത്. സംസ്ഥാനങ്ങളിലെയും ജില്ലകളിലെയും തിരഞ്ഞെടുത്ത വനവാസി യുവാക്കളുമായാണ് കേന്ദ്രമന്ത്രി സംവദിക്കുന്നത്.
വനവാസി ജനതയുടെ ജീവിതശൈലി, ഭാഷ എന്നിവ മനസിലാക്കുക, വനവാസി യുവാക്കൾക്ക് വിവിധ സ്ഥലങ്ങൾ സന്ദർശിക്കുന്നതിന് അവസരം ഒരുക്കുക എന്നതാണ് പരിപാടിയുടെ ലക്ഷ്യം. വിദ്യാഭ്യാസം, വികസനം, തൊഴിലവസരങ്ങൾ എന്നിവയെ കുറിച്ച് അവബോധം സൃഷ്ടിക്കുന്നതിലാണ് പരിപാടി പ്രധാനമായും ശ്രദ്ധ കേന്ദ്രീകരിക്കുന്നത്
രാജ്യത്തിന്റെ വിവിധ ഭാഗങ്ങളിലായി നടന്ന സാങ്കേതിക, വ്യാവസായിക മുന്നേറ്റങ്ങളെ കുറിച്ച് യുവാക്കളെ ബോധവന്മാരാക്കുന്നതിനും പരിപാടി ലക്ഷ്യമിടുന്നു. യുവാക്കൾക്ക് ഭരണഘടനാ അധികാരികളുമായും പ്രമുഖ വ്യക്തികളുമായും സംവദിക്കാനുള്ള അവസരം ഒരുക്കും. കൂടാതെ പാനൽ ചർച്ചകളും പരിപാടിയിൽ സംഘടിപ്പിക്കുന്നുണ്ട്. ആസാദി കാ അമൃതിന് കീഴിലുള്ള പ്രവർത്തനങ്ങളെ കുറിച്ചും യുവാക്കളിൽ ധാരണ ഉണ്ടാക്കുമെന്ന് അധികൃതർ അറിയിച്ചു.
