മലയാളികളുടെ ഷോപ്പിംഗ് രീതിയിൽ ഒഴിച്ചു നിർത്താനാകാത്ത ഒന്നായി ഓൺലൈൻ ഷോപ്പിംഗ് മാറി കഴിഞ്ഞു. സാങ്കേതിക വിദ്യയുടെ വളർച്ചയും ഇന്റർനെറ്റിന്റെ പുരോഗതിയും ഓൺലൈൻ ഷോപ്പിംഗ് കൂടുതൽ സുതാര്യവും സൗകര്യപ്രദവുമാക്കി. ഓൺലൈൻ ഷോപ്പിംഗ് സൈറ്റുകൾ വ്യാപകമായതോടെ കടയിൽ പോയി ക്യൂ നിൽക്കാനും സാധനങ്ങൾ തിരഞ്ഞു പിടിക്കാനുമുള്ള ക്ഷമ വലിയൊരു വിഭാഗം ആളുകളിലും ഇല്ലാതായി.
ഫ്ളൈറ്റ് ടിക്കറ്റ്, ടിവി, ഭക്ഷണം, വസ്ത്രങ്ങൾ, ഫർണിച്ചർ എന്നിങ്ങനെ എന്തും ഇന്ന് വിരൽ തുമ്പിൽ ലഭ്യമാണ്. ഇന്ന് വീടിന് മുന്നിൽ സാധനമെത്തുന്നതിനാൽ തന്നെ ഇത് കൂടുതൽ ജനപ്രിയമായി. എന്നാൽ നേട്ടങ്ങൾക്കൊപ്പം തന്നെ ചില കോട്ടങ്ങളും ഓൺലൈൻ ഷോപ്പിംഗിനുണ്ട്. അവ എന്തൊക്കെയെന്ന് നോക്കാം…
ക്വാളിറ്റി ചെക്ക് ചെയ്യുന്നതിനുള്ള അവസരമില്ല
ഗുണനിലവാരം മനസിലാക്കാം എന്നതാണ് കടയിൽ നേരിട്ടെത്തി സാധനം വാങ്ങുന്നതു കൊണ്ടുള്ള പ്രയോജനം. എന്നാൽ കളർഫുൾ ചിത്രം കണ്ട് സാധനം വാങ്ങുമ്പോൾ കബളിപ്പിക്കപ്പെടാനുള്ള സാധ്യത വളരെ കൂടുതലാണ്. കയ്യിൽ കിട്ടുമ്പോൾ മാത്രമാകും യാഥാർത്ഥ്യം തിരിച്ചറിയുക.
പ്രതികരണം മനസിലാക്കി വാങ്ങാനാകില്ല
ഷോപ്പിൽ നിന്നും സാധനം വാങ്ങുമ്പോൾ സെയിൽ അസിസ്റ്റന്റിന്റെ സഹായം ഒപ്പമുണ്ടാകും. ഇത് സാധനങ്ങളുടെ ഗുണനിലവാരം മനസിലാക്കാൻ എളുപ്പത്തിൽ സഹായിക്കുന്നു. എന്നാൽ ഓൺലൈൻ ഷോപ്പിംഗിൽ റിവ്യൂ ആശ്രയിച്ച് മാത്രമാകും വാങ്ങാൻ സാധിക്കുക. ചില സൈറ്റുകളിൽ ഇന്ന് ഇൻസ്റ്റന്റ് ചാറ്റ് സർവീസ് എന്ന പേരിൽ ഓൺലൈൻ അസിസ്റ്റന്റിന്റെ സേവനം ലഭ്യമാണ്.
ഡെലിവറിക്ക് വേണ്ടിയുള്ള കാത്തിരിപ്പ്
ഇഷ്ടപ്പെട്ടത് തിരഞ്ഞെടുത്താൽ ഇത് കയ്യിൽ കിട്ടുന്നത് വരെ പലർക്കും സമാധാനം ഉണ്ടാകില്ല. ഈ കാത്തിരിപ്പാണ് ഓൺലൈൻ പർച്ചേഴ്സിംഗിന്റെ പ്രധാന പ്രശ്നം. ചിലപ്പോൾ ഡെലിവറി ആകുമെന്ന് പറയുന്നതിലും ദിവസങ്ങൾ മുന്നോട്ട് നീങ്ങാറുണ്ട്.
കൂടാതെ ഓൺലൈനിൽ എത്തുന്ന സാധനങ്ങൾക്ക് കേടുപാടുകൾ സംഭവിക്കാറുണ്ട്. ചിലപ്പോൾ സാധനം മാറി വരാറുണ്ട്.
ഷിപ്പിംഗ് ചിലവ്
വാങ്ങുന്ന സാധനങ്ങൾക്ക് സമാനമായി ഷിപ്പിംഗ് ചാർജ് നൽകേണ്ടി വരുന്നത് മറ്റൊരു പ്രധാന പ്രശ്നമാണ്.
