തിരുവനന്തപുരം: സ്കൂൾ വിദ്യാർത്ഥിയ്ക്ക് നേരെ ലൈംഗികാതിക്രമം നടത്തിയ ഓട്ടോ ഡ്രൈവർ അറസ്റ്റിൽ. നെയ്യാറ്റിൻകര, കുളത്തൂർ സ്വദേശി അനു (27) ആണ് പിടിയിലായത്. ഈ മാസം 16 നായിരുന്നു കേസിന് ആസ്പദമായ സംഭവം. വൈകുന്നേരം വീട്ടിലേയ്ക്ക് പോകാനായി ബസ് കാത്തുനിന്ന പെൺകുട്ടിയെ അമരവിളയിൽ വിടാമെന്ന് പറഞ്ഞ് പ്രതി ഓട്ടോയിൽ കയറ്റുകയായിരുന്നു.
കുട്ടിക്കൊപ്പം മറ്റൊരു സ്ത്രീയും ഓട്ടോയിൽ കയറി. ഇവർ അടുത്ത സ്റ്റോപ്പിൽ ഇറങ്ങുകയും ചെയ്തു. ഓട്ടോയിൽ വിദ്യാർത്ഥിനി മാത്രമായതോടെ പ്രതി അശ്ലീലച്ചുവയോടെ സംസാരിക്കാൻ തുടങ്ങി. ഇയാളുടെ പെരുമാറ്റം കണ്ട് ഭയന്ന പെൺകുട്ടി ഇറങ്ങണം എന്ന ആവശ്യപ്പെട്ടപ്പോൾ ആളൊഴിഞ്ഞ ഒരിടത്ത് വണ്ടി നിർത്തിയ ശേഷം ലൈംഗിക ചേഷ്ടകൾ കാണിക്കുകയും ലൈംഗികാതിക്രമത്തിന് ശ്രമിക്കുകയും ചെയ്തു. തുടർന്ന് പെൺകുട്ടി വണ്ടിയിൽ നിന്ന് ഇറങ്ങി ഓടിരക്ഷപ്പെടുകയായിരുന്നു.
വിദ്യാർത്ഥിനി രക്ഷിതാക്കളെ വിവരമറിയിക്കുകയും വെള്ളറട പോലീസിൽ പരാതി നൽകുകയും ചെയ്തു. വെള്ളറട എസ്.ഐ റസൂൽ രാജിന്റെ നേതൃത്വത്തിൽ നടത്തിയ രഹസ്യാന്വേഷണത്തിൽ പ്രതി പ്ലാമുട്ടുകട ജംഗ്ഷനിലെ ഓട്ടോ ഡ്രൈവറാണെന്ന് കണ്ടെത്തി. തുടർന്ന് ഇയാളെ പിടികൂടി നടത്തിയ ചോദ്യം ചെയ്യലിൽ കുറ്റം സമ്മതിക്കുകയായിരുന്നു. തുടർന്ന് പ്രതിയെ അറസ്റ്റു ചെയ്തു റിമാഡ് ചെയ്തു.
