മലയാളികളുടെ പ്രിയപ്പെട്ട നടിയാണ് അഭിരാമി. ഒരു ടെലിവിഷൻ അവതാരകയിൽ നിന്ന് സിനിമാ രംഗത്തേക്കുള്ള അഭിരാമിയുടെ കടന്നു വരവ് സുരേഷ് ഗോപി ചിത്രത്തിലൂടെയായിരുന്നു. 1999-ൽ ഇറങ്ങിയ പത്രം ആയിരുന്നു താരത്തിന്റെ അരങ്ങേറ്റ ചിത്രം. പിന്നീട് മമ്മൂട്ടി, മോഹൻലാൽ, ജയറാം തുടങ്ങിയവരുടെ നായികയായി തിളങ്ങി. വർഷങ്ങൾക്ക് ശേഷം വീണ്ടും ഒരു സുരേഷ് ഗോപി ചിത്രത്തിൽ അഭിനയിക്കുന്നതിന്റെ സന്തോഷത്തിലാണ് അഭിരാമി. ഗരുഡൻ എന്ന ചിത്രത്തിലൂടെയാണ് വീണ്ടും തന്റെ ഇഷ്ട നായകനൊപ്പം താരം സ്ക്രീൻ പങ്കിടുന്നത്.
ഗരുഡൻ എന്ന സിനിമയുടെ പ്രമോഷന്റെ ഭാഗമായി നടന്ന ഒരു അഭിമുഖത്തിൽ സുരേഷ് ഗോപിയെപ്പറ്റി അഭിരാമി പറഞ്ഞ വാക്കുകളാണ് ഇപ്പോൾ സമൂഹമാദ്ധ്യമങ്ങളിൽ ശ്രദ്ധ നേടുന്നത്. സുരേഷ് ഗോപിയുമായുള്ള ബന്ധത്തെപ്പറ്റിയുള്ള ചോദ്യത്തിനാണ് താരം ഉത്തരം നൽകിയിരിക്കുന്നത്. സുരേഷ് ഗോപി നല്ല ഒരു മനുഷ്യനാണെന്നും കാപട്യം തീരെ ഇല്ലെന്നും അഭിരാമി പറയുന്നു.
‘പണ്ട് എങ്ങനെയാണോ അതേപോലെ തന്നെയാണ് സുരേഷേട്ടൻ ഇന്നും. മാറ്റങ്ങളൊന്നും എനിക്ക് ഫീൽ ചെയ്തിട്ടില്ല. അദ്ദേഹം നല്ലൊരു സഹോദരനാണ്. സുരേഷേട്ടൻ ഒരാളെ ഇഷ്ടപ്പെടുകയാണെങ്കിൽ അദ്ദേഹം അവരെ ആത്മാർത്ഥമായി സംരക്ഷിക്കും. എന്തെങ്കിലും പ്രശ്നം വരുകയാണെങ്കിൽ നമുക്ക് സുരേഷേട്ടനോട് പറയാം. അദ്ദേഹം നമ്മളെ ഉറപ്പായും സഹായിക്കും. നല്ലൊരു മനുഷ്യനാണ്. ഇൻഡസ്ട്രിയുടെ ഒരു കാപട്യമൊന്നും ഇല്ലാത്ത സാധാരണക്കാരനാണ് സുരേഷേട്ടൻ. അദ്ദേഹത്തിന്റെ ചിന്താധാരകളും രാഷ്ട്രീയവുമെല്ലാം അദ്ദേഹത്തിന്റെ മാത്രമാണ്. അത് സുരേഷേട്ടന്റെ ഇഷ്ടമാണ്. ഒരു മനുഷ്യൻ എന്ന നിലയിൽ അദ്ദേഹം നല്ലൊരു വ്യക്തിയാണ്’- അഭിരാമി പറഞ്ഞു.
