എറണാകുളം: തൃക്കാക്കരയിലെ ഹോട്ടലുകളിൽ നഗരസഭയുടെ ആരോഗ്യവിഭാഗത്തിന്റെ പരിശോധന. വൃത്തിഹീനമായ സാഹചര്യത്തിൽ പാകം ചെയ്തതും പഴകിയതുമായ ഭക്ഷണസാധനങ്ങൾ നിരവധി ഹോട്ടലുകളിലുള്ളതായി പരിശോധനയിൽ കണ്ടെത്തി. സഹകരണ ആശുപത്രിയുടെ ക്യാന്റീനിൽ നിന്നുൾപ്പെടെ ഒൻപത് ഹോട്ടലുകളിൽ നിന്നാണ് പഴകിയ ഭക്ഷണം പിടികൂടിയിരിക്കുന്നത്.
പരിശോധനയ്‌ക്ക് ശേഷം തൃക്കാക്കരയിലെ ഒൻപത് ഹോട്ടലുകൾക്ക് ആരോഗ്യവിഭാഗം നോട്ടീസ് നൽകി. പലയിടത്തും പാചക തൊഴിലാളികൾക്ക് ഹെൽത്ത് കാർഡില്ലെന്നും ആരോഗ്യവിഭാഗം കണ്ടെത്തിയിട്ടുണ്ട്. ഷവർമ കഴിച്ചതിന് പിന്നാലെ ചികിത്സയിലായി യുവാവ് മരിച്ച സംഭവത്തിന്റെ പശ്ചാത്തലത്തിലാണ് ഈ പരിശോധന. വരും ദിവസങ്ങളിലും നഗരസഭ ആരോഗ്യവിഭാഗം പരിശോധന നടത്തുമെന്നാണ് ലഭിക്കുന്ന വിവരം.
