ഇന്ത്യയിൽ നിന്നുള്ള മാമ്പഴ കയറ്റുമതിയിൽ വൻ വർദ്ധനവ്. ഏപ്രിൽ മുതൽ ഓഗസ്റ്റ് വരെയുള്ള കാലയളവിൽ 19 ശതമാനം വർദ്ധനവാണ് ഉണ്ടായിരിക്കുന്നത്. നിലവിൽ 41 രാജ്യങ്ങളിലേക്കാണ് ഇന്ത്യയിൽ നിന്നും മാമ്പഴം കയറ്റുമതി ചെയ്യുന്നത്. ഇന്ത്യൻ മാമ്പഴത്തിന് വിദേശ രാജ്യങ്ങളിൽ ആവശ്യക്കാർ വർദ്ധിക്കുന്നുവെന്നാണ് വാണിജ്യ മന്ത്രാലയം അടുത്തിടെ പുറത്തുവിട്ട കണക്കുകൾ സൂചിപ്പിക്കുന്നത്.
2023 ഏപ്രിലിനും ഓഗസ്റ്റിനും ഇടയിൽ നാല് കോടി ഡോളർ വിലമതിക്കുന്ന 27,330 മെട്രിക് ടൺ മാമ്പഴമാണ് ഇന്ത്യ വിദേശ രാജ്യങ്ങളിലേക്ക് കയറ്റുമതി ചെയ്തത്. ഇത് മുൻ വർഷങ്ങളിലേക്കാൾ 19 ശതമാനം വർദ്ധനവാണ് രേഖപ്പെടുത്തുന്നത്. 41 രാജ്യങ്ങളാണ് നിലവിൽ ഇന്ത്യയിൽ നിന്നും മാമ്പഴം ഇറക്കുമതി ചെയ്യുന്നത്. ഇതിൽ അമേരിക്കയിലേക്കാണ് ഏറ്റവും അധികം മാമ്പഴം ഇറക്കുമതി ചെയ്യുന്നത്.
2,000 മെട്രിക് ടൺ മാമ്പഴമാണ് അമേരിക്ക ഈ കാലയളവിൽ ഇറക്കുമതി ചെയ്തത്. ന്യൂസിലാൻഡിലേക്കാണ് രണ്ടാമത് ഏറ്റവും അധികം മാമ്പഴം കയറ്റി അയച്ചത്. ഓസ്ട്രേലിയ, ജപ്പാൻ, ദക്ഷിണാഫ്രിക്ക എന്നീ രാജ്യങ്ങളാണ് മൂന്ന്, നാല്, അഞ്ച് സ്ഥാനങ്ങളിൽ ഉള്ളത്.
