തിരുവനന്തപുരം: ഇടത് സർക്കാരിന്റെ അഴിമതി നിറഞ്ഞ ഭരണത്തിൽ രാപ്പകൽ സമരവുമായി എൻഡിഎ. അഴിമതി ആരോപണങ്ങളിൽ മുങ്ങിയ മുഖ്യമന്ത്രി പിണറായി വിജയൻ രാജി വയ്‌ക്കണമെന്ന് ആവശ്യപ്പെട്ട് എൻഡിഎയുടെ നേതൃത്വത്തിൽ സെക്രട്ടറിയേറ്റ് ഉപരോധിച്ചാണ് പ്രതിഷേധിക്കുന്നത്. ബിജെപി ദേശീയ അദ്ധ്യക്ഷൻ ജെ പി നദ്ദ ഉപരോധസമരം ഇന്ന് ഉദ്ഘാടനം ചെയ്യും.
ഇടത് സർക്കാരിന്റെ അഴിമതി ഭരണത്തിനെതിരെയും കരുവന്നൂർ ബാങ്ക് തട്ടിപ്പ് കേസടക്കമുള്ള അഴിമതിയിലും നീതി തേടിയാണ് എൻഡിഎ സെക്രട്ടറിയേറ്റ് ഉപരോധം സമരം നടത്തുന്നത്. കഴിഞ്ഞ ദിവസം രാത്രി എട്ട് മണിയോടെ ഉപരോധ സമരത്തിന് തുടക്കമായി. സിപിഎമ്മിന്റെ അഴിമതി ഭരണത്തിനെതിരെ എൻഡിഎയുടെ നേതൃത്വത്തിൽ സെക്രട്ടറിയേറ്റ് ഉപരോധിച്ച് പ്രതിഷേധിക്കുമെന്ന് ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ കഴിഞ്ഞ ദിവസം അറിയിച്ചിരുന്നു.
മുഖ്യമന്ത്രിയ്‌ക്കെതിരെ അഴിമതി ആരോപണങ്ങൾ ഉയർന്നിട്ടും പാർട്ടി ന്യായീകരണം തുടരുന്നതിലും സംസ്ഥാന വ്യാപകമായി തുടരുന്ന സഹകരണബാങ്ക് കൊള്ളയിലുമാണ് പ്രതിഷേധം ശക്തമാക്കുന്നത്. ബിജെപിയുടെയും എൻഡിഎയുടെയും പ്രമുഖ നേതാക്കൾ പ്രതിഷേധത്തിന്റെ ഭാഗമാകും.. സെക്രട്ടറിയേറ്റിന്റെ മുഴുവൻ കവാടങ്ങളും പ്രവർത്തകർ ഉപരോധിക്കും.
