ഇന്ത്യയുടെ പേര് ഭാരതമെന്ന് മാറ്റുന്നതിനെ അനുകൂലിച്ച് നടി ലെന. ഇന്ത്യ എന്ന പേര് ഭാരതമാക്കുന്നതിൽ എന്താണ് കുഴപ്പമെന്നും നടി ചോദിച്ചു. ഈ രാജ്യത്തിന് ഇന്ത്യ എന്ന് പേരിട്ടത് സാമ്രാജ്യത്വ ശക്തികളാണ്. ഹിന്ദുമതം എന്ന് വിളിക്കുന്ന മതം നമുക്ക് അവിഭാജ്യമാണെന്നും അത് നമ്മൾ സംരക്ഷിക്കണമെന്നും ലെന പറഞ്ഞു. ദി ന്യൂഇന്ത്യൻ എക്സ്പ്രസിന് നൽകിയ അഭിമുഖത്തിലായിരുന്നു നടിയുടെ പ്രതികരണം.
‘നമ്മൾ നമ്മുടെ വേരുകളിലേക്ക് പോകണം. അതിലാണ് ജ്ഞാനം ഉള്ളതെന്ന് ഞാൻ വിശ്വസിക്കുന്നു. ഒരു കൊളോണിയൽ ശക്തിയാണ് നമ്മുടെ രാജ്യത്തിന് ഇന്ത്യ എന്ന പേര് നൽകിയത്. ചെന്നൈ, മുംബൈ, കൊൽക്കത്ത എന്നിങ്ങനെ പല പ്രദേശങ്ങളുടെയും പേര് നമ്മൾ മാറ്റിയില്ലേ. എന്തുകൊണ്ട് ഈ മാറ്റം പാടില്ല? നമ്മുടെ സാഹിത്യത്തിൽ ഭാരതം എന്നത് വളരെ ശക്തമായ പേരാണ്.’
‘നമ്മുടേത് വളരെ അമൂല്യമായ രാജ്യമാണ്. നമുക്ക് കാതലായ നിരവധി കാര്യങ്ങളുണ്ട്. ഈ രാജ്യത്ത് നിരവധി ഭാഷകളുണ്ട്. നമുക്ക് ഒരു പ്രധാന ഭാഷയുണ്ട്, സംസ്കൃതം. നമ്മൾ ഹിന്ദുമതം എന്ന് വിളിക്കുന്ന ഈ മതം നമുക്ക് അവിഭാജ്യമാണ്. അതിനാൽ തന്നെ അത് നമ്മൾ സംരക്ഷിക്കണം. ഏതെങ്കിലും രാഷ്ട്രീയമോ മതപരമോ ഏതെങ്കിലും പ്രത്യയശാസ്ത്രത്തിന്റെ അടിസ്ഥാനത്തിലോ അല്ല ഞാനിത് പറയുന്നത്’ -ലെന പറഞ്ഞു.