സിനിമാ പ്രേമികളുടെ കാത്തിരിപ്പിന് വിരാമമിട്ട് ബറോസ് സിനിമയുടെ റിലീസിംഗ് തീയതി പ്രഖ്യാപിച്ചു. മലയാളികളുടെ സ്വന്തം ലാലേട്ടൻ ആദ്യമായി സംവിധാനം ചെയ്യുന്ന ‘ബറോസ്’ അടുത്ത വർഷം മാർച്ച് 28-ന് തിയേറ്ററുകളിൽ പ്രദർശനത്തിനായി എത്തും. ഈ വമ്പൻ പ്രഖ്യാപനമാണ് ഇപ്പോൾ സിനിമാ പ്രേമികളുടെ കാതുകളെ ഹരം കൊള്ളിപ്പിക്കുന്നത്. മോഹൻലാൽ തന്നെയാണ് സമൂഹ മാദ്ധ്യമത്തിലൂടെ ഇക്കാര്യം അറിയിച്ചിരിക്കുന്നത്.
ചിത്രത്തിന്റെ സുപ്രധാന വിവരങ്ങൾ നവംബർ നാലിന് വൈകിട്ട് അഞ്ച് മണിയ്ക്ക് അറിയിക്കുമെന്ന് താരം നേരത്തെ വ്യക്തമാക്കിയിരുന്നു. ചിത്രത്തിന്റെ പുതിയ വിശേഷങ്ങൾക്കായി അക്ഷമരായി കാത്തിരുന്ന ആരാധകർക്ക് മുന്നിലേക്കാണ് ഇപ്പോൾ ഈ സന്തോഷ വാർത്ത എത്തിയിരിക്കുന്നത്. പോർച്ചുഗീസ് പശ്ചാത്തലത്തിലുള്ള സിനിമയായ ബറോസിന്റെ പുതിയ 3D പോസ്റ്ററും പങ്കുവച്ചാണ് തിയേറ്ററുകളെ പൂരപ്പറമ്പാക്കുന്നതിന് മോഹൻലാൽ തിരിക്കൊളുത്തിയിരിക്കുന്നത്.
വാസ്കോഡഗാമയുടെ നിധി സൂക്ഷിപ്പുകാരനായ ഭൂതമായാണ് ബറോസിനെ ആവിഷ്കരിക്കുന്നത്. 400 വർഷത്തിനിപ്പുറം ഈ നിധി അതിന്റെ യഥാർത്ഥ അവകാശിക്ക് കൈമാറാൻ ശ്രമിക്കുന്നതാണ് ചിത്രത്തിന്റെ പ്രമേയം. ത്രിഡി ചലച്ചിത്രമായ ബറോസ് ആശിർവാദ് സിനിമാസ് തന്നെയാണ് നിർമ്മിക്കുന്നത്. അതി നൂതന സാങ്കേതികവിദ്യയായ ഗ്രാവിറ്റി ഇല്യൂഷൻ ടെക്നിക്കും സിനിമയിൽ ഉപയോഗിച്ചിട്ടുള്ളതായി അണിയറപ്രവർത്തകർ അറിയിച്ചിരുന്നു. പാസ് വേഗ, റാഫേൽ, അമാർഗോ എന്നീ സ്പാനിഷ് താരങ്ങളും സിനിമയിൽ എത്തുന്നുണ്ട്. അഭിനയ ജീവിതത്തിന്റെ നീണ്ട പാഠങ്ങൾ ഉൾക്കൊണ്ട് സംവിധാനത്തിലേക്കും മോഹൻലാൽ കാൽവെപ്പ് നടത്തുമ്പോൾ സിനിമയുടെ വരവിനായി നിധി കുംഭങ്ങളെ കാക്കുന്ന ഭൂതത്താന്മാരെ പോലെ കണ്ണിൽ എണ്ണയൊഴിച്ച് കാത്തിരിക്കുകയാണ് ആരാധകർ.