ഇലോൺ മസ്കിന്റെ ആർട്ടിഫിഷ്യൽ ഇന്റലിജൻസ് സ്റ്റാർട്ട് അപ്പ് ആയ എക്സ് എഐ വികസിപ്പിച്ച ആദ്യ എഐ മോഡൽ ശനിയാഴ്ച മുതൽ ലഭ്യമാക്കും. തിരഞ്ഞെടുത്ത ആളുകൾക്ക് മാത്രമാകും ആദ്യ ഘട്ടത്തിൽ ലഭ്യമാക്കുക. ഇന്നലെയാണ് ഇലോൺ മസ്ക് ഇക്കാര്യം ഔദ്യോഗികമായി അറിയിച്ചത്. ഓപ്പൺ എഐയുടെ ചാറ്റ് ജിപിടി ശ്രദ്ധേയമായതിന് പിന്നാലെയാണ് എക്സ് എഐ സ്വന്തമായി ഒരു എഐ മോഡൽ അവതരിപ്പിക്കുന്നത്.
മസ്കിന്റെ പങ്കാളിത്തത്തോടെയായിരുന്നു 2015-ൽ ഓപ്പൺ എഐയ്ക്ക് തുടക്കം കുറിക്കുന്നത്. 2018-ഓടെ കമ്പനിയുടെ ബോർഡ് അംഗത്വം മസ്ക് രാജിവെച്ചു. നിലവിലുള്ള മോഡലുകളിൽ മികച്ചതാണ് എക്സ് എഐയുടെ പുതിയ മോഡലെന്ന് മസ്ക് എക്സിൽ പങ്കുവെച്ച പോസ്റ്റിലൂടെ പറയുന്നു. ഗ്രോക്ക് എന്നാണ് എക്സ് എഐ വികസിപ്പിച്ചെടുത്ത ചാറ്റ്ബോട്ടിന് പേര് നൽകിയിരിക്കുന്നത്.
ആദ്യ ഘട്ട പരീക്ഷണത്തിന് ശേഷം എക്സ് എഐയുടെ ഗ്രോക്ക് സിസ്റ്റം എക്സ് പ്രീമിയം പ്ലസ് വരിക്കാർക്ക് ലഭ്യമാകുമെന്ന് മസ്ക് അറിയിച്ചു. ചാറ്റ് ജിപിടിയ്ക്ക് സമാനമായി ചോദ്യങ്ങൾക്ക് സംഭാഷണ രീതിയിൽ മറുപടി നൽകുന്ന ചാറ്റ്ബോട്ട് ആണ് ഗ്രോക്ക്. ഇന്റർനെറ്റ് ബ്രൗസിംഗ് സംവിധാനവും ഇതിലുണ്ട്. അനാവശ്യ ചോദ്യങ്ങൾക്ക് ഗ്രോക്ക് മറുപടി നൽകില്ലെന്ന് മസ്ക് വ്യക്തമാക്കി.