തിയേറ്ററിൽ ആവേശമായി സുരേഷ്ഗോപിയുടെ ആക്ഷൻ ത്രില്ലർ ചിത്രം ഗരുഡൻ. താരത്തിന്റെ പുത്തൻ സിനിമ ഇരുകൈയും നീട്ടി ഏറ്റെടുത്തിരിക്കുകയാണ് മലയാളികൾ. തിയേറ്ററിലെത്തിയ ആദ്യ ദിനം തന്നെ വലിയ സ്വീകാര്യതയാണ് ചിത്രത്തിന് ലഭിച്ചത്. പോലീസ് വേഷത്തിലെത്തി ആരാധകരെ അമ്പരിപ്പിക്കുന്ന പ്രകടനമാണ് സുരേഷ്ഗോപി ചിത്രത്തിൽ കാഴ്ചവെച്ചിരിക്കുന്നത്.
അഞ്ചാം പാതിര എന്ന ത്രില്ലർ ചിത്രത്തിലൂടെ പ്രേക്ഷകരെ മുൾമുനയിൽ നിർത്തിയ മിഥുൻ മാനുവൽ ആണ് ഗരുഡന്റെ തിരക്കഥ ഒരുക്കിയിരിക്കുന്നത്. ‘ഗരുഡൻ’ തിയറ്ററുകളിൽ പറന്നു നടക്കുമ്പോൾ ബോകാസോഫീസിലെ കളക്ഷൻ വിവരങ്ങളാണ് പുറത്തുവരുന്നത്. രണ്ട് ദിവസം കൊണ്ട് 2.8 കോടിയാണ് കേരളത്തിൽ നിന്ന് മാത്രം ചിത്രം നേടിയത്. ആഗോളതലത്തിൽ 6.5 കോടിയും ഗരുഡൻ നേടിയതായി കണക്കുകൾ പുറത്തുവരുന്നു.
ആദ്യദിനത്തെ കളക്ഷനെ അപേക്ഷിച്ച് ഗരുഡന് കൂടുതൽ ഹൗസ് ഫുൾ ഷോകൾ ലഭിച്ചിരിക്കുകയാണ്. പ്രേക്ഷകരുടെ ഭാഗത്ത് നിന്ന് മികച്ച പ്രതികരണമാണ് ചിത്രം നേടുന്നത്. മിഥുൻ മാനുവൽ തന്നെയാണ് ഈ സന്തോഷം പങ്കുവെച്ചിരിക്കുന്നത്. ചിത്രത്തിന്റെ വിജയത്തോട് അനുബന്ധിച്ച് പുതിയ പോസ്റ്ററും അണിയറപ്രവർത്തകർ പുറത്തിറക്കിയിട്ടുണ്ട്.
ഒക്ടോബർ മൂന്നിനാണ് ഗരുഡൻ തിയേറ്ററിലെത്തിയത്. നവാഗതനായ അരുൺ വർമയുടെ സംവിധാനത്തിലൊരുങ്ങിയ തികച്ചുമൊരു ആക്ഷൻ ത്രില്ലർ ചിത്രമാണ് ഗരുഡൻ. സുരേഷ് ഗോപി, ബിജു മേനോൻ എന്നിവർക്കൊപ്പം സിദ്ദിഖ്, അഭിരാമി, നിഷാന്ത് സാഗർ തുടങ്ങിയ നിരവധി താരങ്ങളും ചിത്രത്തിൽ പ്രധാനവേഷത്തിലെത്തുന്നു.
