മേപ്പടിയാൻ എന്ന ഹിറ്റ് സിനിമയിലൂടെ മലയാളി പ്രേക്ഷകരുടെ ഹൃദയം കവർന്ന പ്രിയ സംവിധായകനാണ് വിഷ്ണു മോഹൻ. തന്റെ രണ്ടാമത് ചിത്രമായ ‘കഥ ഇന്നുവരെ’ യുടെ തിരക്കിലാണ് വിഷ്ണു. ബിജു മേനോൻ നായകനാകുന്ന ചിത്രത്തിൽ നർത്തകിയായ മേതിൽ ദേവികയാണ് നായിക.
പാലക്കാട്ടെ കൊല്ലങ്കോടാണ് ‘കഥ ഇന്നുവരെ’ യുടെ ചിത്രീകരണം പുരോഗമിക്കുന്നത്. സിനിമ ഷൂട്ടിംഗ് നടക്കവെ ലൊക്കേഷനിൽ നിന്നുള്ള രസകരമായ ഒരു സംഭവം സമൂഹമാദ്ധ്യമങ്ങളിൽ വൈറലാകുകയാണ്. സ്‌കൂളിൽ ഷൂട്ടിംഗ് നടന്നു കൊണ്ടിരിക്കെ സംവിധായകനോട് ചാൻസ് ചോദിച്ചെത്തിയ ഒരു കുട്ടിയാണ് ഇപ്പോൾ താരം. സന്തോഷ് രാജ് എന്ന വ്യക്തിയാണ് ഇത് സംബന്ധിച്ചുള്ള കുറിപ്പ് ഫെയ്സ്ബുക്കിൽ പോസ്റ്റ് ചെയ്തിരിക്കുന്നത്.
ഫെയ്‌സ്ബുക്ക് പോസ്റ്റ് ഇങ്ങനെ…
‘രാവിലെ ആറരയ്‌ക്ക് മുമ്പ്, മേപ്പടിയാൻ സിനിമയുടെ സംവിധായകൻ വിഷ്ണു മോഹൻ ബിജു മേനോനെ നായകനാക്കി ചിത്രീകരിക്കുന്ന ‘കഥ ഇന്നുവരെ’ എന്ന ഷൂട്ടിംഗ് ലൊക്കെഷനിൽ പ്രൊഡക്ഷൻ മാനേജർമാരെ കണ്ട് അവസരം ചോദിച്ച് എത്തിയ ഒരു അഭിനയകാംക്ഷിക്ക് കിട്ടിയ മറുപടി, ഹൈസ്‌ക്കൂൾ കുട്ടികളുടെ ടേക്‌സ് ആണ് എടുക്കുന്നത് അതിനാൽ അവസരം നൽകാൻ നിർവ്വാഹമില്ലെന്നാണ്…
ആശാനുണ്ടോ വിടുന്നു. ‘ഞാൻ നന്നായി അഭിനയിക്കും… സിനിമയുടെ ഡയറക്ടറെ ഒന്ന് കാണിച്ച് തരാമോ’ എന്നായി അടുത്ത ചോദ്യം. പ്രൊഡക്ഷൻ മാനേജർ നിതിഷ് ചൂണ്ടിക്കാണിച്ചു… ദോ.. ആ.. ഇരിയ്‌ക്കുന്ന ആളാണ് ഡയറക്ടർ…
പിന്നെ കാണുന്ന കാഴ്ച ദാ.. ഇതാണ്…. ഒടുവിൽ നാളെ കഴിഞ്ഞ് പീടിക കടയിൽ സാധനം വാങ്ങാനെത്തുന്ന കുട്ടിയാക്കാമെന്ന ഉറപ്പും വാങ്ങിയതിന് ശേഷമാണ് ആശാൻ ചായ കുടിക്കാൻ തയ്യാറായത്..’
