അന്ധകാരത്തിന് മേൽ പ്രകാശം നേടുന്ന വിജയം, തിന്മയുടെ മേൽ നന്മയുടെ വിജയം ആഘോഷിക്കപ്പെടുന്ന ദിനമാണ് ദീപാവലിയായി ആഘോഷിക്കുന്നത്. ദക്ഷിണേന്ത്യയെ അപേക്ഷിച്ച് ഉത്തരേന്ത്യയിലാണ് കൂടുതൽ ആഘോഷം നടക്കുന്നതെങ്കിലും നമ്മുടെ ആഘോഷത്തിനും ആവേശത്തിനും കുറവില്ല.
നാടും നഗരവും പ്രകാശിച്ച് നിൽക്കുന്ന കാഴ്ച, ആകാശത്തിൽ നക്ഷത്രങ്ങൾ ഒരുമിച്ചതുപോലെ പൊട്ടിവിരിയുന്ന കരിമരുന്ന് കലാപ്രകടനം. വിളക്കും ദീപങ്ങളും കൊണ്ട് വീടുകൾ അലങ്കരിക്കുക, പൂക്കളം തീർക്കുക, പുതുവസ്ത്രം ധരിക്കുക, പൂജ നടത്തുക തുടങ്ങിയവയും ദീപാവലി ആഘോഷത്തിന്റെ ഭാഗമാണ്. ആഘോഷങ്ങളുടെ ഭാഗമായി പടക്കം പൊട്ടിക്കരുതെന്ന് ഹൈക്കോടതി നിർദ്ദേശം നിലനിൽക്കുന്നുണ്ട്. പാരിസ്ഥിതിക ആശങ്കകളും മലിനീകരണവും കുറയ്ക്കാനാണ് ഇത്തരം നിർദ്ദേശങ്ങൾ മുന്നോട്ടുവെയ്ക്കുന്നത്. പരിസ്ഥിതി സൗഹാർദവും ശബ്ദരഹിതവുമായ പടക്കങ്ങൾ പ്രോത്സാഹിപ്പിക്കുന്നതാണ്. പരമ്പരാഗത പടക്കങ്ങൾക്ക് ബദലായി മറ്റ് ചില വഴികൾ പരിചയപ്പെടാം..
പരിസ്ഥിതി സൗഹാർദമായി ആഘോഷിക്കാൻ ഉദ്ദേശിക്കുന്നവർക്കുള്ള മികച്ച ബദലാണ് ‘ഹരിത പടക്കങ്ങൾ’. സാധാരണ പടക്കങ്ങളിൽ ഉപയോഗിക്കുന്ന അലുമിനിയം, ബേരിയം, കാർബൺ തുടങ്ങിയ ഹാനികരമായ രാസവസ്തുക്കൾ ഹരിത പടക്കങ്ങളിൽ ഉപയോഗിക്കുന്നില്ല. മറ്റ് പടക്കത്തെ അപേക്ഷിച്ച് 30 ശതമാനം മലിനീകരണം മാത്രമാണ് സൃഷ്ടിക്കുന്നത്. പടക്കം പൊട്ടുമ്പോൾ ഉണ്ടാകുന്ന ശബ്ദത്തിലും രണ്ട് പടക്കങ്ങളും തമ്മിൽ വ്യത്യാസമുണ്ട്.സാധാരണ പടക്കം 160 ഡെസിബെൽ ശബ്ദം ഉണ്ടാക്കുമെങ്കിൽ ഹരിത പടക്കം 110 ഡെസിബെൽ ശബ്ദമാണ് ഉണ്ടാക്കുക.
തിളങ്ങുന്ന നിറത്തിൽ വരുന്ന ഗ്ലോ സ്റ്റിക്കുകളും പടക്കത്തിനുള്ള ബദലുകളാണ്. ഏറെ ദൂരെ നിന്ന് പോലും ഇത് ദൃശ്യമാണ്. രാത്രിയിൽ മികച്ച ദൃശ്യവിരുന്ന് ഒരുക്കാൻ ഗ്ലോ സ്റ്റിക്കുകൾക്ക് സാധിക്കും. പേപ്പർ കഷ്ണങ്ങളോ നിറങ്ങളോ മറ്റ് വസ്തുക്കളോ നിറച്ച ബലൂണുകളാണ് ബലൂൺ പടക്കങ്ങൾ. ഇവ പൊട്ടുമ്പോൾ ശബ്ദം ഉണ്ടാകുമെങ്കിലും പരമ്പരാഗത പടക്കത്തിന് സമാനമായ രീതിയിൽ പരിസ്ഥിതിക്ക് ദോഷം ചെയ്യുന്നില്ല. മറ്റ് രാജ്യങ്ങളിൽ വ്യാപകമായി ഉപയോഗിക്കുന്നവയാണ് ആകാശ വിളക്കുകൾ. ഇവയും ആഘോഷം പൊടിക്കാനുള്ള മികച്ച ഓപ്ഷനാണ്. ഇവ അന്തരീക്ഷ മലിനീകരണമോ ശബ്ദ മലിനീകരണമോ സൃഷ്ടിക്കുന്നില്ല.
