ജോർജിയ: ഹോളിവുഡ് ചിത്രങ്ങളിൽ ഡ്യൂപ്പായി വേഷമിട്ട സ്റ്റണ്ട് താരം തരജ റാംസെസിനും (41) മക്കൾക്കും വാഹനാപകടത്തിൽ ദാരുണാന്ത്യം. ജോർജിയയിലെ ഹൈവേയിൽ വെച്ചാണ് താരവും മക്കളും സഞ്ചരിച്ച കാർ അപകടത്തിൽപ്പെട്ടത്. മക്കളായ സുൻഡരി(13), കിസാസി (10), എട്ട് മാസം പ്രായമുള്ള മകൾ ഫുജിബോ എന്നിവരാണ് അപകടത്തിൽ മരിച്ചത്.
അപകടത്തിൽ പരിക്കേറ്റ തരജയുടെ രണ്ട് മക്കൾ ആശുപത്രിയിൽ ചികിത്സയിലാണ്. ജോർജിയയിൽ നടക്കുന്ന ഹാലോവീൻ ആഘോഷത്തിന് ശേഷം വീട്ടിലേയ്ക്ക് മടങ്ങി വരുന്നതിനിടെയാണ് താരത്തിനും മക്കൾക്കും അപകടം സംഭവിച്ചത്. ഇവർ സഞ്ചരിച്ചിരുന്ന കാർ ഒരു ട്രാക്ടർ ട്രെയിലറുമായി കൂട്ടിയിടിക്കുകയായിരുന്നു.
ഹോളിവുഡ് ചിത്രങ്ങളായ അവഞ്ചേഴ്സ് എൻഡ് ഗെയിമിലും ബ്ലാക്ക്പാന്തറിലും തരജ റാംസെ ഡ്യൂപ്പായി വേഷമിട്ടിട്ടുണ്ട്. ഇത് കൂടാതെ നിരവധി ഹോളിവുഡ് ചിത്രങ്ങളിൽ മാർഷ്യൽ ആർട്സ്, ബൈക്ക്, കാർ സംഘട്ടന രംഗങ്ങളിലും താരം ഡ്യൂപ്പായി വേഷമിട്ടിട്ടുണ്ട്. ചില ചിത്രങ്ങളിൽ ആർട്ട് ഡയറക്ടറായും തരജ പ്രവർത്തിച്ചിട്ടുണ്ട്. ദി സൂയിസൈഡ് സ്ക്വാഡ്, അറ്റ്ലാന്റ, ക്രീഡ് 3 തുടങ്ങിയ ചിത്രങ്ങളിലും താരം ഡ്യൂപ്പായി അഭിനയിച്ചിട്ടുണ്ട്.
