96-ാം പിറന്നാൾ നിറവിലാണ് രാഷ്‌ട്രതന്ത്രജ്ഞനും മുതിർന്ന ബിജെപി നേതാവുമായ ലാൽകൃഷ്ണ അദ്വാനി. 1980-90 കാലഘട്ടങ്ങളിൽ രാഷ്‌ട്രത്തെ കെട്ടിപ്പടുക്കാൻ ശക്തമായി പ്രവർത്തിച്ച നേതാക്കളിൽ ഒരാളാണ് അദ്വാനി. അദ്ദേഹത്തിന് ദീർഘായുസും ആരോഗ്യവും നേർന്ന് പ്രധാനമന്ത്രി നരേന്ദ്രമോദി അടക്കമുള്ള നേതാക്കൾ രംഗത്തു വന്നിരുന്നു. പിറന്നാൾ ദിനത്തിൽ തന്നെ അദ്വാനിയെ കാണാൻ സാധിച്ചതിലുള്ള സന്തോഷത്തിലാണ് മുൻ എംപിയും നടനുമായ സുരേഷ് ഗോപിയും. എൽ.കെ അദ്വാനിയെ നേരിട്ടു കണ്ട് ആശംസകൾ നേർന്നിരിക്കുകയാണ് താരം.
” അദ്വാനി ജിയെ അദ്ദേഹത്തിന്റെ പിറന്നാൾ ദിനത്തിൽ തന്നെ കാണാൻ സാധിച്ചതിൽ സന്തോഷമുണ്ട്. ഞാൻ ശിരസ്സ് കൂപ്പി അദ്ദേഹത്തിന്റെ കാലിൽ തൊട്ടുവണങ്ങി. എന്നെ ആകർഷിച്ചത് അവിടെയുണ്ടായിരുന്ന ചിത്രങ്ങളായിരുന്നു. വാജ്‌പേയ് ജിയുടെയും അദ്വാനി ജിയുടെയും ചരിത്രപരമായ ചിത്രങ്ങൾ ദർശിച്ചപ്പോൾ എന്നിൽ ഊർജ്ജം പടർന്നു. 80-90 കാലഘട്ടത്തിൽ ഭാരതത്തെ കെട്ടിയുയർത്തിയ മഹത് വ്യക്തികൾ. ഭാരത മഹാഭാരതത്തിലെ ഭീഷ്മാചാര്യർ.”- സുരേഷ് ഗോപി കുറിച്ചു.
എൽ. കെ അദ്വാനിയുമായുള്ള ചിത്രങ്ങളും സുരേഷ് ഗോപി സമൂഹമാദ്ധ്യമത്തിൽ പങ്കുവച്ചിട്ടുണ്ട്. മകൾ ഭാഗ്യയുടെ വിവാഹത്തിന് ക്ഷണിക്കാൻ കൂടിയാണ് അദ്വാനിയുടെ വസതിയിൽ സുരേഷ് ഗോപി എത്തിയത്. ജനുവരി 17-ന് ഗുരുവായൂരിൽ വച്ചാണ് ഭാഗ്യയുടെ വിവാഹം. മാവേലിക്കര സ്വദേശികളായ മോഹനന്റെയും ശ്രീദേവിയുടെയും മകൻ ശ്രേയസാണ് വരൻ. നേരത്തെ പ്രധാനമന്ത്രി നരേന്ദ്രമോദിയെയും സുരേഷ് ഗോപി നേരിട്ടെത്തി വിവാഹത്തിന് ക്ഷണിച്ചിരുന്നു.
