ആരാധകർക്ക് ഏറെ പ്രതീക്ഷ നൽകി എത്തിയ ബിഗ് ബജറ്റ് ചിത്രമായിരുന്നു ഒടിയൻ. എന്നാൽ ചിത്രം വേണ്ടത്ര സാമ്പത്തിക വിജയം നേടിയില്ല. നിരവധി പരസ്യ ചിത്രങ്ങളുടെ സംവിധായകനായിരുന്ന വി.എ ശ്രീകുമാറിന്റെ കന്നിച്ചിത്രമായിരുന്നു ഒടിയൻ. ഇപ്പോഴിതാ മോഹൻലാലും വി.എ ശ്രീകുമാറും വീണ്ടും ഒരുമിക്കുകയാണ്. ഇത്തവണ ഇരുവരും ഒന്നിക്കുന്നത് ഒരു പരസ്യ ചിത്രത്തിന് വേണ്ടിയാണ്.
പാലക്കാടാണ് പരസ്യത്തിന്റെ ചിത്രീകരണം നടക്കുന്നത്. ഒടിയൻ ചിത്രീകരിച്ച സ്ഥലങ്ങൾ തന്നെയായിരിക്കും പ്രധാന ലൊക്കേഷൻ. സിനിമയിൽ എത്തുന്നതിന് മുൻപേ നിരവധി പരസ്യ ചിത്രങ്ങളുടെ സംവിധായകനായിരുന്നു ശ്രീകുമാർ. പുഷ് എന്ന പേരിലുള്ള ശ്രീകുമാറിന്റെ അഡ്വർട്ടൈസിംഗ് കമ്പനിയുടെ പരസ്യങ്ങളിൽ ഇന്ത്യയിലെ ഒട്ടുമിക്ക സിനിമാ സൂപ്പർതാരങ്ങളും അഭിനയിച്ചിട്ടുണ്ട്.
