ബ്രസിലിയ: പ്രമുഖ ബ്രസീലിയൻ സോഷ്യൽ മീഡിയ ഇൻഫ്ളുവൻസർ ലുവാന ആൻഡ്രേഡ് അന്തരിച്ചു. 29 വയസായിരുന്നു. കാൽമുട്ടിന് നടത്തിയ ലിപ്പോസക്ഷൻ ശസ്ത്രിയക്രിയയെ തുടർന്ന് ലുവാനയ്ക്ക് ദേഹാസ്വാസ്ഥ്യം അനുഭവപ്പെട്ടിരുന്നതായി കുടുംബം പറഞ്ഞു. ഹൃദയാഘാതമാണ് മരണകാരണം.
കഴിഞ്ഞ ദിവസമാണ് ലുവാന കാൽമുട്ടിന്റെ പ്ലാസ്റ്റിക് സർജറിയ്ക്കായി ആശുപത്രിയിൽ എത്തിയത്. ശസ്ത്രക്രിയ നടത്തി ഒരു ദിവസം പിന്നിട്ടപ്പോൾ ഹൃദായാഘാതം മൂലം ലുവാന മരണപ്പെടുകയായിരുന്നു. ശസ്ത്രക്രിയക്കിടെയുണ്ടായ സങ്കീർണതകളെ തുടർന്ന് നാല് ഹൃദയ സ്തംഭനങ്ങളാണ് യുവതിയ്ക്കുണ്ടായത്. ശരീരത്തിലെ കൊഴുപ്പ് നീക്കം ചെയ്യുന്നതിനായാണ് ലിപ്പോസക്ഷൻ സർജറി ചെയ്യുന്നത്. ശസ്ത്രക്രിയയ്ക്കിടെ യുവതിയുടെ ഹൃദയം നിലയ്ക്കുകയായിരുന്നു.
ധമനികളിൽ രക്തക്കട്ടകൾ രൂപപ്പെടുന്ന പ്രശ്നം യുവതിയെ ബാധിച്ചിരുന്നുവെന്നാണ് സാവോപോളയിലെ ആശുപത്രി അധികൃതർ പറയുന്നത്. ശസ്ത്രക്രിയ നിർത്തിവച്ച് ലുവാനയെ ഐയിയുവിലേക്ക് മാറ്റി തുടർ ചികിത്സകൾ നൽകിയെങ്കിലും മരണപ്പെടുകയായിരുന്നു. ഇത്തരം പ്ലാസ്റ്റിക് സർജറികൾ എല്ലാവരിലും വിജയിക്കണമെന്നില്ലെന്നും ചിലരിൽ ആരോഗ്യപ്രശ്നങ്ങൾ പ്രകടമായേക്കാമെന്നും ആരോഗ്യവിദഗ്ധർ അറിയിച്ചു.
പ്രശസ്ത ഫുഡ്ബോൽ താരം നെയ്മറിന്റെ സുഹൃത്ത് കൂടിയാണ് ലുവാന. ” രണ്ട് മോശം വാർത്തകൾ എന്നെ തേടി വന്ന ദിവസമാണിന്ന്. ആദ്യം എന്റെ കാമുകിയുടെ മാതാപിതാക്കളെ കൊള്ള സംഘം കെട്ടിയിട്ടു. ഭാഗ്യത്തിന് അവർ രണ്ട് പേരും രക്ഷപ്പെട്ടു. ഇപ്പോഴിതാ എന്റെ സുഹൃത്തിന്റെ മരണവും എന്നെ തേടി എത്തിയിരിക്കുന്നു. ലുവാനയുടെ കുടുംബത്തിന്റെ ദു:ഖത്തിനൊപ്പം പങ്കുച്ചേരുന്നു.” -നെയ്മർ കുറിച്ചു. ബ്രസീലിലെ സിയോപോളിൽ ജനിച്ചു വളർന്ന ലുവാന സോഷ്യൽ മീഡിയ ഇൻഫ്ളുവൻസറും സ്റ്റേജ് പ്രോഗ്രാം അസിസ്റ്റന്റുമായി പ്രവർത്തിച്ചുവരികയായിരുന്നു. നെയ്മർ അടക്കമുള്ള പ്രശസ്ത താരങ്ങളാണ് ലുവാനയെ ഇൻസ്റ്റഗ്രാമിൽ ഫോളോ ചെയ്യുന്നത്.