ഗ്രാമീണ ജീവിതത്തിന്റെ നേർക്കാഴ്ചകൾ തുറന്നു കാണിക്കുന്ന രേഖാ ചിത്രങ്ങൾ പോലെ തെളിഞ്ഞു നിൽക്കുന്നതാണ് പാലക്കാടൻ ഗ്രാമങ്ങളുടെ ദൃശ്യഭംഗി. വലിയ വിമാനത്താവളങ്ങളോ, പാർലമെന്റ് മന്ദിരങ്ങളോ ഇവിടുത്തെ ഗ്രാമീണർക്ക് അവകാശപ്പെടാനില്ല. കുന്നും, മലകളും, പാടങ്ങളും, കാവുകളും സംരക്ഷിക്കുന്ന പച്ചയായ ഗ്രാമീണജീവിതം മാത്രമേ ഇവിടെയുള്ളൂ.. നഗര ജീവിതം മടുത്തവർക്ക് കരിമ്പനകളുടെ സ്വന്തം നാട്ടിൽ രാപ്പാർക്കാം.
സീതാർകുണ്ട് വെള്ളച്ചാട്ടം
പാലക്കാട് ജില്ലയിലെ നെല്ലിയാമ്പതി പ്രദേശത്തെ ഒരു സ്ഥലമാണ് സീതാർകുണ്ട്. വളരെ ഉയരമുള്ള വെള്ളച്ചാട്ടം ഇവിടുത്തെ പ്രധാന ആകർഷണങ്ങളിലൊന്നാണ്. ഇവിടെനിന്ന് നോക്കിയാൽ ദൂരെയായി ചുള്ളിയാർ, മീങ്കര, എന്നീ അണക്കെട്ടുകളും കൊല്ലങ്കോട് പട്ടണവും കാണാം. വനവാസകാലത്ത് ഭഗവാൻ ശ്രീരാമനും ലക്ഷ്മണനും സീതാ ദേവിയും ക്ഷീണിതരായി ഈ പ്രദേശത്ത് എത്തിച്ചേരുകയും തുടർന്ന് സീതാ ദേവിക്ക് സ്നാനം ചെയ്യാൻ ശ്രീരാമൻ തൊട്ടടുത്ത അരുവി കാണിച്ചു കൊടുക്കുകയും ചെയ്യുന്നു. ഈ അരുവിയിൽ സീതാ ദേവി കുളിച്ചതിനാൽ ഈ പ്രദേശം സീതാർ കുണ്ട് എന്ന പേരിൽ അറിയപ്പെടുകയായിരുന്നെന്നാണ് ഇവിടെയുള്ള ജനങ്ങൾ വിശ്വസിച്ച് പോരുന്നത്. സീതാദേവി കുളിച്ച നദിയിൽ അവിടുത്തെ വനവാസികളും ജനങ്ങളും സീതാദേവിയെ സങ്കൽപ്പിച്ച് പൂജ നടത്തുന്ന ചടങ്ങ് ഇപ്പോഴും നടക്കുന്നു.
ചുള്ളിയാർ അണക്കെട്ട്
പാലക്കാട് ജില്ലയിൽ മറ്റൊരു ദൃശ്യ ഭംഗിയാണ് ചുള്ളിയാർ അണക്കെട്ട്. കൊല്ലങ്കോടിന് സമീപം മുതലമടയിലാണ് ചുള്ളിയാർ അണക്കെട്ട് സ്ഥിതി ചെയ്യുന്നത്.
കവ
പാലക്കാട് ടൗണിൽ നിന്നും ഏകദേശം 14 കിലോമീറ്റർ ദൂരമാണ് ഇവിടേക്കുള്ളത്. കവയെ കുറിച്ച് വർണ്ണിക്കാൻ വാക്കുകളില്ലെന്ന് പലരും പറായുണ്ട്. പശ്ചിമഘട്ട മലനിരകളുടെ താഴ്വരയിൽ സ്ഥിതി ചെയ്യുന്ന അതി സുന്ദരമായ സ്ഥലമാണ് കവ. മലമ്പുഴ ഡാമും ഇതിനടുത്താണ്. നെല്ലിയാമ്പതി കഴിഞ്ഞാൽ സഞ്ചാരികൾ കണ്ടിരിക്കേണ്ട സ്ഥലമാണ് കവ.
ചിങ്ങൻചിറ കറുപ്പ്സ്വാമി അമ്പലം
സിനിമാ ചിത്രീകരണങ്ങളുടെ സ്ഥിര പ്രദേശമാണിത്. അരയാലുകൾ കാവൽ നിൽക്കുന്ന കുറുപ്പ് സ്വാമി അമ്പലം പാലക്കാടിന്റെ മറ്റൊരു പ്രത്യേകതയാണ്. വർണ്ണിച്ചാൽ തീരാത്ത പാലക്കാടൻ ഗ്രാമങ്ങളിലെ കുന്നും, പാടവും, മാഞ്ചോടുകളും, കാവുകളും, നിങ്ങളെ സ്വാഗതം ചെയ്യുന്നു..
