വാട്ട്സ്ആപ്പിൽ പുതിയ വോയ്സ് ചാറ്റ് ഫീച്ചർ അവതരിപ്പിച്ച് മെറ്റ. വലയി വാട്സ്ആപ്പ് ഗ്രൂപ്പുകൾക്ക് വേണ്ടിയാണ് പുതിയ ഫീച്ചർ അവതരിപ്പിച്ചിരിക്കുന്നത്. വാട്ട്സ്ആപ്പ് ബീറ്റാ പതിപ്പിൽ ഈ ഫീച്ചർ എത്തിയതായി അടുത്തിടെ റിപ്പോർട്ടുകൾ പുറത്തു വന്നിരുന്നു. ഇപ്പോഴിതാ ആഗോള തലത്തിൽ എല്ലാ ഉപയോക്താക്കളിലേക്കും കമ്പനി പുതിയ ഫീച്ചർ എത്തിച്ചിരിക്കുകയാണ്.
ഗ്രൂപ്പ് വോയ്സ് കോൾ, വീഡിയോ കോൾ എന്നിങ്ങനെ ഗ്രൂപ്പ് അംഗങ്ങൾക്ക് ഉപകാരപ്രദമാകുന്ന നിരവധി ഫീച്ചറുകൾ ഇതിനോടകം തന്നെ അവതരിപ്പിച്ചിട്ടുണ്ട്. ഇവയ്ക്ക് പുറമെയാണ് പുതിയതായി വോയ്സ് ഫീച്ചറും അവതരിപ്പിച്ചിരിക്കുന്നത്. ഗ്രൂപ്പ് വോയ്സ് കോൾ, വോയ്സ് ചാറ്റ്, വോയ്സ് മെസേജിംഗ് ഫീച്ചറുകളെല്ലാം ഒന്നല്ലെ എന്ന സംശയവും എല്ലാവർക്കുമുണ്ടാകും.
ക്ലബ് ഹൗസ്, ടെലഗ്രാം, ഡിസ്കോർഡ് എന്നിവയിൽ ലഭ്യമായിട്ടുള്ള സമാനമായ വോയ്സ് ചാറ്റ് ഫീച്ചറാണ് വാട്ട്സ്ആപ്പിലും എത്തിയിരിക്കുന്നത്. ഗ്രൂപ്പ് അംഗങ്ങൾക്ക് ഇതിലൂടെ ഒരു വോയ്സ് ചാറ്റ് ആരംഭിക്കാനാകും. ഇതിൽ പങ്കെടുക്കാനും സംസാരിക്കാനും താത്പര്യമുള്ളവർക്ക് പങ്കെടുക്കാവുന്നതാണ്. താത്പര്യമില്ലാത്തവർക്ക് ഇതിന് പുറത്ത് നിൽക്കാവുന്നതാണ്.
സാധാരണ വോയ്സ് കോൾ ചെയ്യുമ്പോൾ അംഗങ്ങൾക്കെല്ലാം ഫോണിൽ റിംഗിഗ് ലഭിക്കും. എന്നാൽ വോയ്സ് ചാറ്റ് ആരംഭിക്കുമ്പോൾ ഇത്തരം ശല്യം ഒഴിവാകുന്നു. നിശബ്ദമായ പുഷ് നോട്ടിഫിക്കേഷൻ മാത്രമാകും ഫോണുകളിൽ കാണിക്കുക. വോയിസ് ചാറ്റിൽ പങ്കെടുത്ത് മറ്റ് വാട്ട്സ്ആപ്പ് ചാറ്റുകൾ ഉപയോഗിക്കാൻ സാധിക്കും. ചാറ്റിൽ പങ്കെടുക്കാതെ തന്നെ ആരെല്ലാം ചാറ്റിൽ പങ്കെടുത്തിട്ടുണ്ടെന്ന് മനസിലാക്കാനും ഗ്രൂപ്പ് അംഗങ്ങൾക്കാകും.
വോയിസ് ചാറ്റ് ആരംഭിക്കുമ്പോൾ ചെറിയൊരു ബാനർ രൂപത്തിൽ വാട്ട്സ്ആപ്പിന് മുകളിലായി ആക്ടീവ് ചാറ്റിന്റെ വിവരങ്ങൾ കാണാനാകും.. 33 മുതൽ 128 ആളുകൾ വരെയുള്ള വലിയ ഗ്രൂപ്പുകളിലാണ് വോയിസ് ചാറ്റ് ഫീച്ചർ അവതരിപ്പിച്ചിരിക്കുന്നത്.