റാഞ്ചി: ഇന്ത്യൻ ഗോത്രവർഗക്കാരുടെ നേതാവ് ബിർസാ മുണ്ട പ്രഭുവിന്റെ ജന്മവാർഷികദിനത്തോടനുബന്ധിച്ച് ബിർസാ മുണ്ട മെമ്മോറിയൽ പാർക്കും മ്യൂസിയവും സന്ദർശിച്ച് പ്രധാനമന്ത്രി നരേന്ദ്രമോദി. ബിർസാ മുണ്ടയുടെ സ്മാരകത്തിൽ പ്രധാനമന്ത്രി പുഷ്പാർച്ചന നടത്തി. ഝാർഖണ്ഡ് മുഖ്യമന്ത്രി ഹേമന്ത് സോറൻ, കേന്ദ്ര മന്ത്രി അർജുൻ മുണ്ട, ഝാർഖണ്ഡ് ഗവർണർ സി പി രാധാകൃഷ്ണൻ എന്നിവർക്കൊപ്പമാണ് പ്രധാനമന്ത്രി പുഷ്പാർച്ചന നടത്താനെത്തിയത്.
ബിർസാ മുണ്ടയുടെ ജന്മവാർഷികദിനത്തിൽ പ്രധാനമന്ത്രി അദ്ദേഹത്തിന് ശ്രദ്ധാഞ്ജലി അർപ്പിച്ചു. ബിർസാ മുണ്ടയുടെ ജന്മസ്ഥലമായ ഉലിഹാതു ഗ്രാമത്തിലും പ്രധാനമന്ത്രി സന്ദർശനം നടത്തും. വനവാസി സമൂഹത്തിന്റെ ധൈര്യത്തിനും ആത്മാഭിമാനത്തിനും പേരുകേട്ട സംസ്ഥാനമാണ് ഝാർഖണ്ഡ്. ഇവിടെയുള്ള ഓരോരുത്തരും രാജ്യത്തിന്റെ പുരോഗതിയ്ക്കായി പ്രവർത്തിക്കുന്നു. സംസ്ഥാനത്തിന്റെ ശോഭനമായ ഭാവിയ്ക്ക് വേണ്ടി ആശംസിക്കുന്നുവെന്നും പ്രധാനമന്ത്രി എക്സിൽ കുറിച്ചു.
ഝാർഖണ്ഡിൽ പിഎം-കിസാന്റെ 15-ാം ഗഡു പ്രധാനമന്ത്രി വിതരണം ചെയ്യും. നിരവധി വികസന പദ്ധതികൾ ഉദ്ഘാടനം ചെയ്യുകയും തറക്കല്ലിടുകയും ചെയ്യും. ദ്വിദിന സന്ദർശനത്തിനായാണ് പ്രധാനമന്ത്രി ജാർഖണ്ഡിലെത്തിയത്. ബിർസ മുണ്ട വിമാനത്താവളത്തിലെത്തിയ പ്രധാനമന്ത്രിയ്ക്ക് ഉജ്ജ്വല വരവേൽപ്പാണ് നൽകിയത്. രാജ്ഭവനിലേക്കുള്ള യാത്രയിൽ റോഡിന്റെ ഇരുവശത്തും ജനങ്ങൾ തിങ്ങികൂടുകയും അദ്ദേഹത്തെ അഭിവാദ്യം ചെയ്യുകയും ചെയ്തു.