മുംബൈ: ഇന്ത്യ- ന്യൂസിലൻഡ് സെമി പോരാട്ടത്തിന് സാക്ഷിയായി ഗാലറിയിൽ എത്തിയത് വൻ താരനിരയാണ്, ഇതിൽ ക്രിക്കറ്റ് താരങ്ങളും ഫുട്ബോൾ താരങ്ങളും സിനിമാ താരങ്ങളുമുണ്ട്. ലോകകപ്പ് മത്സരത്തിന്റെ ഓരോ നിമിഷത്തിലും ആരാധകർക്കൊപ്പം ഗാലറിയിൽ ആവേശഭരിതരാകുന്ന ഇവരുടെ വീഡിയോയാണ് ഇപ്പോൾ സമൂഹമാദ്ധ്യമങ്ങളിൽ വൈറൽ. കിയാര അദ്വാനി, സിദ്ധാർത്ഥ് മൽഹോത്ര, രൺബീർ കപൂർ, വിക്കി കൗശൽ, ഷാഹിദ് കപൂർ, മീരാ രജ്പുത്, ജോൺ എബ്രഹാം, സച്ചിൻ തെണ്ടുൽക്കർ,ഡേവിഡ് ബെക്കാം തുടങ്ങിയവരാണ് ഗാലറിയെ താരസമ്പന്നമാക്കിയത്.
എന്നാൽ ഇതിനെല്ലാം അപ്പുറത്തേക്ക് ആരാധകരുടെ കണ്ണെത്തിയത് വിരാട് കോലിയുടെ പങ്കാളിയും നടിയുമായ അനുഷ്കയുടെ നേരെയാണ്. കോലിയുടെ ഓരോ വിജയങ്ങളും ആഘോഷമാക്കിയും പ്രോത്സാഹിപ്പിച്ചും ഗ്യാലറിയിൽ സജീവമായിരുന്നു അനുഷ്ക. അതുപോലെ തന്നെ, കളിക്കിടയിലും അനുഷ്കയോട് ആശയവിനിമയം നടത്തുന്ന കോലിയുടെ വീഡിയോകളും പലപ്പോഴും സമൂഹമാദ്ധ്യമങ്ങളിൽ വൈറലായിട്ടുണ്ട്. വാങ്കഡെയിൽ ഏകദിന ക്രിക്കറ്റിൽ 50 സെഞ്ച്വറികൾ തികച്ച വിരാടിന് അനുഷ്ക ഫ്ളൈയിംഗ് കിസ് കൊടുക്കുന്നതായിരുന്നു ഇന്ന് സ്റ്റേഡിയത്തിലുണ്ടായ മറ്റൊരു മനോഹര നിമിഷം.
ഒരു പോലെയുളള വസ്ത്രങ്ങൾ ധരിച്ചാണ് കിയാര അദ്വാനിയും സിദ്ധാർത്ഥ് മൽഹോത്രയും മത്സരം കാണാനെത്തിയത്. വെള്ള നിറത്തിലുളള ടോപ്പും നീല ജീൻസും നീല തൊപ്പിയുമാണ് കിയാര ധരിച്ചിരുന്നത്. വെള്ള ടീ ഷർട്ടും പാന്റ്സും തൊപ്പിയുമായിരുന്നു സിദ്ധാർത്ഥിന്റെ വേഷം. ഇന്ത്യൻ ടീമിന്റെ ജഴ്സി ധരിച്ചാണ് രൺബീർ കപൂറും ആകാശ് അംബാനിയും വിക്കി കൗശലും സെമി പോരാട്ടം കാണാനെത്തിയത്.
