ശ്രീനഗർ: ജമ്മു കശ്മീരിലെ പൂഞ്ച് ജില്ലയിലെ സുറാൻകോട്ട് ക്ഷേത്രത്തിൽ സ്ഫോടനം. ശിവക്ഷേത്രത്തിന് സമീപത്തായാണ് സ്ഫോടനം ഉണ്ടായത്. രാത്രി 8:40 -ഓടെയായിരുന്നു സംഭവം. സ്ഫോടനത്തെ തുടർന്ന് ക്ഷേത്രത്തിന്റെ മതിൽക്കെട്ട് തകർന്നതായി അധികൃതർ അറിയിച്ചു. സംഭവത്തിൽ ആളപായമില്ല. തുടർന്ന് ഫോറൻസിക് സംഘം സ്ഥലത്ത് പരിശോധന നടത്തി.
സ്ഫോടനം നടന്നയുടൻ തന്നെ പോലീസും സുരക്ഷാ സേനയും പ്രദേശത്തെത്തി. ഉഗ്ര ശബ്ദത്തോടെയുള്ള സ്ഫോടനമാണ് ക്ഷേത്രത്തിൽ നടന്നതെന്ന് റിപ്പോർട്ടുകൾ പറയുന്നു. സുരക്ഷാ ഏജൻസികളും സേനയും അന്വേഷണം ആരംഭിച്ചു. ആക്രമണത്തിന്റെ ഉത്തരവാദിത്വം ആരും ഏറ്റെടുത്തിട്ടില്ല.
ക്ഷേത്രത്തിന്റെ പിന്നിലായാണ് സ്ഫോടനം ഉണ്ടായത്. ഇതിനാൽ സുറാൻകോട്ടിലെ ഹൈന്ദവരെ ലക്ഷ്യമിട്ട് നടത്തിയ സ്ഫോടനമാണോ എന്ന കാര്യത്തിലും സംശയമുണ്ട്.
