ന്യൂഡൽഹി: കേന്ദ്ര വാണിജ്യ വ്യവസായ മന്ത്രി പീയുഷ് ഗോയൽ യൂട്യൂബ് സിഇഒ നീൽ മോഹനുമായി കൂടിക്കാഴ്ച നടത്തി. ഇന്ത്യയുമായി യൂട്യൂബിന്റെ സഹകരണം ശക്തിപ്പെടുത്തുന്നതിന് കൂടുതൽ അവസരങ്ങൾ ഒരുക്കുന്നത് സംബന്ധിച്ച് ഇരു കൂട്ടരും ചർച്ച ചെയ്തു.
‘ യൂട്യൂബ് സിഇഒ നീൽ മോഹനുമായി കൂടിക്കാഴ്ച നടത്തിയതിൽ വളരെ ഏറെ സന്തോഷമുണ്ട്. യൂട്യൂബിന് രാജ്യത്ത് കൂടുതൽ സഹകരണം ഉണ്ടാക്കുന്നതിന് ഇന്ത്യ എങ്ങനെയാണ് അവസരം നൽകുന്നതെന്ന് ഞങ്ങൾ ചർച്ച ചെയ്തു’.- പീയുഷ് ഗോയൽ എക്സിൽ കുറിച്ചു. കൂടാതെ ഇന്ത്യയിൽ കൂടുതൽ വിദ്യാഭ്യാസ അവസരങ്ങൾ നൽകുന്നതിനായി സ്റ്റാൻഡ്ഫോർഡ് യൂണിവേഴ്സിറ്റി അധികൃതരുമായി വട്ടമേശ സമ്മേളനം നടത്തിയതായും അദ്ദേഹം അറിയിച്ചു.
നാല് ദിവസത്തെ യുഎസ് സന്ദർശനത്തിനായി എത്തിയ മന്ത്രി കഴിഞ്ഞ ദിവസം മെക്രോൻ ടെക്നോളജി സിഇഒ സഞ്ജയ് മെഹറോത്രയുമായി കൂടിക്കാഴ്ച നടത്തിയിരുന്നു. ഇന്ത്യയിൽ വളർന്ന് വരുന്ന സെമികണ്ടക്ടർ ഇക്കോ സിസ്റ്റവുമായുള്ള കൂടുതൽ സഹകരണത്തെ കുറിച്ച് ഇവർ ചർച്ച ചെയ്തു.