സങ്കടമോ സന്തോഷമോ അമിതമായാൽ ധാരാളം ഭക്ഷണം കഴിക്കുന്നവരുണ്ട്. മനസിന്റെ വൈകാരിക സംഘർഷങ്ങളിൽനിന്ന് രക്ഷപ്പെടാൻ വേണ്ടിയാണ് പലപ്പോഴും ഭക്ഷണം കഴിക്കുന്നത്. ഇങ്ങനെ ഭക്ഷണം കഴിക്കുന്നതിനെ ഇമോഷണൽ ഈറ്റിംഗ് എന്നാണ് അറിയപ്പെടുന്നത്. ഇതിനുള്ള പ്രധാന കാരണം ഇത്തരത്തിൽ ഭക്ഷണം കഴിക്കുമ്പോൾ തലച്ചോറിന് വളരെ അധികം ആശ്വാസം കിട്ടുമെന്ന് തോന്നുന്നതിനാലാണ് ചിലരെങ്കിലും ഇങ്ങനെ ചെയ്യുന്നത്.
എന്നാൽ ഇത് അനാരോഗ്യകരമായ ശീലമാണ്. ഇത് നമ്മുടെ മാനസികമായ പ്രശ്നങ്ങൾക്കും അമിതമായുള്ള സന്തോഷം അടക്കുന്നതിനുമുള്ള ഒരു വഴിയല്ല. ഇങ്ങനെ ആഹാരം കഴിക്കുന്നതിലൂടെ പൊണ്ണത്തടി, മറ്റ് ശാരീരിക രോഗങ്ങൾ തുടങ്ങി നിരവധി പ്രശ്നങ്ങളിലേക്ക് നമ്മെ നയിക്കും.
ജോലിയുടെ സ്ട്രെസ്, സാമ്പത്തിക പ്രശ്നങ്ങൾ, വികാരങ്ങളെ നിയന്ത്രിക്കാൻ കഴിയാത്ത അവസ്ഥ ഇതെല്ലാം കൊണ്ടാണ് ഇമോഷണൽ ഈറ്റിംഗ് സംഭവിക്കുന്നത്. അതുപോലെ, ചില ഡയറ്റ് പിന്തുടരുന്നവരും അറിയാതെ ഇമോഷണൽ ഈറ്റിംഗ് ചെയ്യാറുണ്ട്. ഇത് എല്ലാവരുടെയും ജീവിതത്തിൽ അറിയാതെ സംഭവിക്കുന്നതാണ്.
ഇങ്ങനെ അമിതമായി ആഹാരം കഴിക്കുന്നതിൽ നിന്നും മോചനം നേടാനായി ചിലകാര്യങ്ങൾ ചെയ്താൽ മതിയാകും. ഇതിൽ പ്രധാനപ്പെട്ട ഒന്നാണ് ഭക്ഷണം കൃത്യസമയത്ത് ചാർട്ട് ചെയ്ത് കഴിക്കുക എന്നത്. അതായത്, വിശക്കുന്നുണ്ട് എന്ന് നമുക്ക് തോന്നാതിരിക്കുക. ദേഷ്യം, വേദന, സന്തോഷം, സമ്മർദ്ദം ഇവയിൽ ഏത് സമയത്താണ് നിങ്ങൾക്ക് ഭക്ഷണം കഴിക്കാൻ തോന്നുന്നത് എന്ന് കൃത്യമായി മനസിലാക്കുക. ആ സാഹചര്യങ്ങൾ മനപ്പൂർവം ഒഴിവാക്കുക.
അത്തരം സന്ദർഭങ്ങളിൽ ഇഷ്ടമുള്ള എന്തെങ്കിലും ഹോബിയിൽ മുഴുകുക. നടക്കാൻ പോകുക, സിനിമയ്ക്ക് പോകുക, നിങ്ങളുടെ കുട്ടികൾ/വളർത്തുമൃഗങ്ങൾക്കൊപ്പം കളിക്കുക, സംഗീതം കേൾക്കുക, അല്ലെങ്കിൽ വായിക്കുക. അതുമല്ലെങ്കിൽ നിങ്ങളെ മനസിലാക്കുന്ന സുഹൃത്തുക്കളോട് സംസാരിക്കുക,അവരോടൊപ്പം സമയം ചെലവഴിക്കുക ഇങ്ങനെയൊക്കെ ചെയ്യുന്നത് നല്ലതാണ്.
പച്ചക്കറികളും പഴങ്ങളും സാലഡിനരിയുന്നത് പോലെ അരിഞ്ഞ് കൈവശം വയ്ക്കുക. അതെല്ലെങ്കിൽ ജ്യൂസുകൾ തയ്യാറാക്കി വെക്കുക. ഭക്ഷണം കഴിച്ചേ മതിയാവൂ എന്ന സാഹചര്യത്തിൽ ഇവയെടുത്ത്കഴിക്കാം.. ഓഫീസിലാണെങ്കിൽ പഴങ്ങളും പച്ചക്കറികളും അരിഞ്ഞത് പാത്രത്തിലാക്കി ബാഗിൽ വെക്കുക
പ്രഭാത സവാരി ശീലമാക്കുക. രാവിലെ പുല്ലിലൂടെ നഗ്നപാദനായി നടക്കുന്നത് നല്ലതാണ്, പെട്ടന്ന് എടുത്ത് കഴിക്കാൻ പാകത്തിൽ വറുത്തതും പൊരിച്ചതുമായ ജങ്ക് ഫുഡുകളും പാനീയങ്ങളും സൂക്ഷിക്കാതിരിക്കുക.