ആമസോണിലൂടെ ഷോപ്പിംഗ് നടത്തുന്ന ഉപയോക്താക്കൾക്ക് ഇൻസ്റ്റന്റ് ലോൺ നൽകാനൊരുങ്ങി കൊട്ടക് മഹീന്ദ്ര ബാങ്ക്. പ്രതിമാസ തിരിച്ചടവ് വ്യവസ്ഥയിൽ ഉത്പന്നങ്ങൾ വാങ്ങുന്നതിന് അവസരമൊരുക്കുന്നതിന് വേണ്ടിയാണ് കൊട്ടക് മഹീന്ദ്ര ബാങ്കിന്റെ നീക്കം. ഡിജിറ്റൽ കാർഡ് സേവനമാണ് കൊട്ടക്കിന്റെ ഈ കാർഡ്ലെസ് ഇഎംഐ നൽകുന്നത്. ആമസോൺ പേയിൽ നടത്തുന്ന ഇടപാടുകളിൽ മാത്രമാകും സേവനം ലഭ്യമാകുന്നത്.
ഇലക്ട്രോണിക് ഉപകരണങ്ങൾ, ഫർണീച്ചറുകൾ, ബ്യൂട്ടി ഉത്പന്നങ്ങൾ, അപ്പാരൽ തുടങ്ങിയ വിഭാഗങ്ങളിലായി ആമസോണിൽ ഷോപ്പിംഗ് നടത്തുന്നവർക്ക് ഈ അവസരം ഗുണകരമാകും. ഡെബിറ്റ് കാർഡ്, ക്രെഡിറ്റ് കാർഡ് എന്നിവ ഉപയോഗിക്കാതെ ഇഎംഐ തവണ വ്യവസ്ഥയിലൂടെ മാറ്റാൻ സാധിക്കുന്ന സംവിധാനമാണ് ഇത്.
മുൻകൂട്ടി അംഗീകാരം ലഭിച്ച ഉപയോക്താക്കൾക്ക് വളരെ എളുപ്പത്തിലും അതിവേഗത്തിലും ഹ്രസ്വകാല വായ്പയിലൂടെ ലഭിക്കും. ആമസോൺ പേയിലൂടെ പേമെന്റ് നടത്താൻ ശ്രമിക്കുമ്പോഴാണ് ഈ ഓപ്ഷനും കാണാനാകുക. പേമെന്റ് നടത്താൻ ക്ലിക്ക് ചെയ്യുന്നിടത്ത് കൊട്ടക് കാർഡ്ലെസ് ഇഎംഐ എന്ന ഓപ്ഷൻ കാണാനാകും. ഇതിൽ ക്ലിക്ക് ചെയ്യുന്നതോടെ ലോൺ ലഭ്യമാകും.
ക്രെഡിറ്റ് ലിമിറ്റ് പരമാവധി അഞ്ച് ലക്ഷം രൂപയാണ്. തിരിച്ചടവിന് മൂന്ന്, ആറ്, ഒമ്പത്, 12 എന്നിങ്ങനെ തവണകളിലായി സാവകാശം ലഭ്യമാണ്. പാൻകാർഡ് നമ്പർ നൽകേണ്ടതായി വരും. മൊബൈലിൽ ലഭ്യമാകുന്ന വൺ-ടൈം പാസ്വേഡ് അഥവാ ഒടിപി നൽകുകയാണ് എങ്കിൽ കാർഡ്ലെസ് ഇഎംഐ ആക്ടീവാകും.
