രാജ്യമൊട്ടാകെ പ്രകമ്പനം കൊള്ളിച്ച കാന്താരയുടെ രണ്ടാം ഭാഗം വരുന്നു. സിനിമയുടെ ടീസറും ഫസ്റ്റ് ലുക്ക് പോസ്റ്ററും പുറത്തിറങ്ങി. റിഷഭ് ഷെട്ടി തിരക്കഥയെഴുതി സംവിധാനം ചെയ്ത് നായകനായെത്തിയ കാന്താരയുടെ ആദ്യം ഭാഗം കന്നട സിനിമാ ലോകത്തിന്റെ തന്നെ നാഴികകല്ലായി മാറിയിരുന്നു. ചിത്രത്തിന്റെ രണ്ടാം ഭാഗം വരുന്നെന്ന വാർത്തകൾ പ്രചരിച്ചതിന് പിന്നാലെ ആകാംക്ഷയോടെ കാത്തിരിക്കുകയാണ് ആരാധകർ. ഇന്നിതാ ചിത്രത്തിന്റെ അത്യുഗ്രം അപ്ഡേറ്റ് പുറത്തുവിട്ടിരിക്കുകയാണ് അണിയറപ്രവർത്തകർ.
ആദ്യ ഭാഗത്തിൽ തന്നെ പ്രേക്ഷകരുടെ മനസിലേക്ക് ഇടംനേടിയ കഥാപാത്രമാണ് റിഷഭ് ഷെട്ടി അവതരിപ്പിച്ച ശിവ. രണ്ടാം ഭാഗത്തിൽ ശിവ എന്ന കഥാപാത്രത്തിന്റെ ഭൂതക്കാലത്തെ ആസ്പദമാക്കിയാണ് ചിത്രമൊരുങ്ങുന്നത്. ഇരുട്ടിനിടയിൽ നെഞ്ച് വിരിച്ച് നിൽക്കുന്ന രൂപം, കണ്ണിൽ തിളങ്ങുന്ന തീ ഗോളങ്ങൾ, കഴുത്തിൽ രുദ്രാക്ഷമാല, ശരീരമാകെ രക്തക്കറകൾ, ഇതാണ് കാന്താര ചാപ്റ്റർ-1-ന്റെ ടീസർ വീഡിയോയിലുള്ളത്.
പ്രകാശമേ.. പ്രകാശത്തിൽ നിങ്ങൾക്കെല്ലാം ദൃശ്യമാണ് ഇത് പ്രകാശമല്ല, ദർശനമാണ് . ഇനി നടന്നതും മുന്നേ നടന്നതും നിങ്ങൾക്ക് ദൃശ്യമാകും’ എന്ന് തുടങ്ങുന്ന ടീസറിൽ പുതിയ അവതാരപ്പിറവി തന്നെയാണ് കാന്തര എ ലെജന്റിലൂടെ പ്രേക്ഷകരിലേക്ക് എത്തുന്നത്. ഇന്ത്യയിലെ മുൻനിര നിർമ്മാണ കമ്പനിയായ ഹോംബാലെ ഫിലിംസാണ് വൻ ബജറ്റിൽ ഒരുങ്ങുന്ന കാന്താര ലെജന്റിന്റെ നിർമ്മാണം നിർവഹിക്കുന്നത്. വിജയ് കിരാഗണ്ടൂർ ആണ് ചിത്രത്തിന്റെ നിർമ്മാതാവ്.
കേരളത്തിൽ ബ്ലോക്ക്ബസ്റ്റർ വിജയം നേടിയ ചിത്രം കാന്താര പൃഥ്വിരാജ് പ്രൊഡക്ഷൻസാണ് കേരളത്തിൽ എത്തിച്ചത്. ലിസ്റ്റിൻ സ്റ്റീഫന്റെ മാജിക് ഫ്രെയിംസ് ആണ് കാന്താരയുടെ വിതരണം നിർവഹിച്ചത്. കാന്താര എ ലെജന്റ് കന്നഡ, ഹിന്ദി, തമിഴ്, തെലുങ്ക്, മലയാളം, ബംഗാളി, ഇംഗ്ലീഷ് എന്നീ ഏഴ് ഭാഷകളിലായിരിക്കും റിലീസ് ചെയ്യുക. കാന്താര ലെജന്റിന്റെ അണിയറപ്രവർത്തകരെക്കുറിച്ചും താരങ്ങളെക്കുറിച്ചുമുള്ള ഒഫീഷ്യൽ അനൗൺസ്മെന്റിന് കാത്തിരിക്കുകയാണ് സിനിമാലോകം.
