എറണാകുളം: കോടതിയുടെ വിലക്ക് ലംഘിച്ച് നവകേരള സദസിൽ വീണ്ടും കുട്ടികളെ പങ്കെടുപ്പിച്ചതിൽ രൂക്ഷ വിമർശനവുമായി ഹൈക്കോടതി. ഇത്രയും ചെറുപ്പത്തിൽ കുട്ടികളിൽ രാഷ്ട്രീയം കുത്തിവെക്കേണ്ടതില്ലെന്നും ഇത്തരം പ്രവർത്തനങ്ങൾ ഇനി ആവർത്തിച്ചാൽ കടുത്ത നടപടി സ്വീകരിക്കുമെന്നും ഹൈക്കോടതി നിർദ്ദേശിച്ചു. ജസ്റ്റിസ് ദേവൻ രാമചന്ദ്രനാണ് മുന്നറിയിപ്പ് നൽകിയത്.
സർക്കാരിന്റെ നവകേരള സദസിൽ വിദ്യാർത്ഥികളെ പങ്കെടുപ്പിക്കുന്നത് രാഷ്ട്രീയമാണെന്നും കുട്ടികളിൽ രാഷ്ട്രീയം കുത്തിവെക്കരുതെന്നും കോടതി വ്യക്തമാക്കി. വിഷയത്തിൽ സർക്കാർ ഇതുവരെ എടുത്ത നടപടികൾ ഓരോന്നും വിശദീകരിക്കണമെന്നും കോടതി നിർദ്ദേശിച്ചു. ഹർജി അടുത്ത ആഴ്ച്ച വീണ്ടും പരിഗണിക്കുന്നതായിരിക്കും.
കഴിഞ്ഞ ദിവസമാണ് കോടതിയുടെ നിർദ്ദേശം ലംഘിച്ച് നവകേരള സദസിനെ അഭിവാദ്യം ചെയ്യുന്നതിനായി വിദ്യാർത്ഥികളെ റോഡിലിറക്കിയത്. മലപ്പുറം എടപ്പാൾ തുയ്യം സ്കൂളിലെ കുട്ടികളെയാണ് നട്ടുച്ചയ്ക്ക് പൊരിവെയിലത്ത് ഇറക്കി നിർത്തിയത്. പ്രൈമറി-പ്രീപ്രൈമറി ക്ലാസുകളിലെ അമ്പതോളം കുട്ടികളെയാണ് റോഡിൽ നിർത്തിയത്. ഇതിനെതിരെ നൽകിയ ഹർജി പരിഗണിക്കവെയാണ് ഹൈക്കോടതിയുടെ വിമർശനം.
