ആരാധകർ പ്രതീക്ഷയോടെ കാത്തിരിക്കുന്ന മോഹൻലാൽ ചിത്രമാണ് ‘നേര്’. ജീത്തു ജോസഫ് സംവിധാനം ചെയ്യുന്ന ചിത്രത്തിൽ പ്രിയാമണിയാണ് നായികയായി എത്തുന്നത്. കോടതി പശ്ചാത്തലത്തിൽ ഒരുങ്ങുന്ന നേരിൽ വക്കീൽ വേഷത്തിലാണ് മോഹൻലാലും പ്രിയാമണിയും എത്തുന്നത്. ഈ മാസം 21-ന് ചിത്രം തിയേറ്ററുകളിൽ എത്തും.
ചിത്രത്തിന്റെ പോസ്റ്ററുകളെല്ലാം ഇതിനോടകം തന്നെ ആരാധകർ ഏറ്റെടുത്തിരിക്കുകയാണ്. ഇപ്പോഴിതാ ചിത്രത്തിന്റെ പൂതിയ പോസ്റ്റർ പുറത്തിറങ്ങിയിരിക്കുകയാണ്. മോഹൻലാലിനെയും പ്രിയാമണിയെയും കൂടാതെ അനശ്വര രാജനെയും ഉൾപ്പെടുത്തിയാണ് പുതിയ പോസ്റ്റർ. ചിത്രത്തിൽ പ്രധാന കഥാപാത്രമായി അനശ്വരയും എത്തുന്നു എന്ന് പോസ്റ്ററിലൂടെ മനസിലാക്കാം.
വിജയങ്ങൾ മാത്രം സമ്മാനിച്ച ചിത്രങ്ങളാണ് ജീത്തു-മോഹൻലാൽ കൂട്ടുക്കെട്ടിൽ വന്നിട്ടുള്ളത്. അത്തരത്തിൽ ഒരു വിജയം ആവർത്തിക്കാൻ നേരിനാകുമോയെന്ന് കണ്ടറിയണം. ചിത്രത്തിന്റെ തിരക്കഥ ഒരുക്കിയിരിക്കുന്നത് അഭിഭാഷകയും അഭിനേത്രിയും കൂടിയായ ശാന്തി മായാദേവിയാണ്. മലയാളം, തമിഴ് സിനിമകളിൽ വക്കീൽ വേഷങ്ങളിൽ ശാന്തി പ്രത്യക്ഷപ്പെട്ടിട്ടുണ്ട്. സതീഷ് കുറുപ്പാണ് ചിത്രത്തിന്റെ ഛായാഗ്രഹണം. വിഷ്ണു ശ്യാം ചിത്രത്തിന് സംഗീത സംവിധാനവും ഒരുക്കുന്നു.
