സ്‌കൂളിൽ പോകാൻ മടിച്ചിരുന്ന കാലത്ത് രാവിലെ സൂര്യൻ ഉദിച്ചില്ലായിരുന്നുവെങ്കിൽ എന്ന് പലരും ആഗ്രഹിച്ചിട്ടുണ്ടാകും. അങ്ങനെയുള്ള സ്ഥലങ്ങൾ ഈ ഭൂമുഖത്ത് എവിടെയെങ്കിലും ഉണ്ടായിരുന്നെങ്കിൽ അങ്ങോട്ട് താമസം മാറണമെന്ന് പോലും കുട്ടിക്കാലത്ത് നാം ചിന്തിച്ചിരിക്കാം. അത്തരം ഇടങ്ങൾ നമ്മുടെ ഭൂമിയിലുണ്ടെന്നുള്ളതാണ് യാഥാർത്ഥ്യം. ശൈത്യകാലങ്ങളിലാണ് സൂര്യന്റെ കിരണങ്ങൾ ഈ സ്ഥലങ്ങളിൽ പതിക്കാത്തത്.
സ്വൽബാർഡ്, നോർവെ
ഒക്ടോബർ മാസത്തിലാണ് സ്വൽബാർഡ് ദ്വീപസമൂഹത്തിൽ സൂര്യൻ അസ്തമിക്കുന്നത്. പിന്നീട് ഫെബ്രുവരി പകുതി വരെ ഇവിടെ രാത്രി മാത്രമാണ്. സൂര്യകിരണങ്ങൾ ഈ കാലയളവിൽ ഇവിടെ പതിക്കാറില്ല. മഞ്ഞു മൂടിയ പ്രദേശത്ത് നക്ഷത്രങ്ങളും ചന്ദ്രന്റെ നിലാവും കണ്ട് വിനോദസഞ്ചാരികൾക്ക് ഇവിടെ ചെലവഴിക്കാം.
ബാരോ,അലാസ്‌ക, യുഎസ്എ
ലോകത്തിലെ ഏറ്റവും വടക്കേയറ്റത്തുള്ള നഗരങ്ങളിലൊന്നായ അമേരിക്കയിലെ ബാരോവിൽ ഇപ്പോൾ ശക്തമായ ശൈത്യകാലമാണ്. ഇവിടെ നവംബർ മാസം മുതൽ സൂര്യൻ അസ്തമിച്ചിരിക്കുകയാണ്. ജനുവരി മാസം വരെ സൂര്യകിരണങ്ങൾ ഈ പ്രദേശത്ത് പതിക്കാതിരിക്കുന്നു.
മർമാൻസ്‌ക്, റഷ്യ
റഷ്യൻ നഗരമായ മർമാൻസ്‌ക് ആണ് ശൈത്യകാലത്ത് സൂര്യപ്രകാശം എത്താത്ത മറ്റൊരു പ്രദേശം. ഈ പ്രദേശങ്ങളിൽ ഡിസംബർ മാസം മുതൽ സൂര്യൻ അസ്തമിക്കുകയും ജനുവരി മാസം അവസാനത്തോടെ സൂര്യൻ ഉദിക്കുകയും ചെയ്യുന്നു. ചില സന്ദർഭങ്ങളിൽ 40 ദിവസം വരെ ഈ പ്രദേശങ്ങളിൽ സൂര്യപ്രകാശം എത്താറില്ല. പൂർണമായും രാത്രി അല്ലെങ്കിലും ചില സമയങ്ങളിൽ നേരിയ വെളിച്ചം പ്രദേശത്തുണ്ടാവാറുണ്ടെന്നാണ് പ്രദേശവാസികൾ പറയുന്നത്.
നൗക്ക്, ഗ്രീൻലൻഡ്
ഗ്രീൻലൻഡിന്റെ തലസ്ഥാനമായ നൗക്കിലും ശൈത്യകാലങ്ങളിൽ സൂര്യപ്രകാശം എത്തിപ്പെടാറില്ല. ഡിസംബർ മാസത്തിലാണ് ഇവിടെ അതിശക്തമായ ശൈത്യം അനുഭവപ്പെടുന്നത്. ജനുവരി മാസം അവസാനം ഈ പ്രദേശത്ത് സൂര്യകിരണങ്ങൾ പതിച്ചു തുടങ്ങുന്നു. ശൈത്യകാലത്ത് ഇവിടെ എത്തുന്ന വിനോദ സഞ്ചാരികൾക്ക് ഔറ ബോറിയാലിസ് ( ഉത്തര ധ്രുവങ്ങളിൽ കാണപ്പെടുന്ന ദീപ്തി പ്രസരം) കാണാനുള്ള അവസരവും ഏറെയാണ്.
