മഞ്ഞൾ നമുക്കെല്ലാവർക്കും അറിയുന്ന ഔഷധഗുണമുള്ള സുഗന്ധവ്യഞ്ജനമാണ്. പണ്ട് വീടുകളിലെ പാടത്തും പറമ്പുകളിലും ഒക്കെ ഇഞ്ചിയും, മഞ്ഞളും ഒരു ഇടവിള കൃഷിയെന്ന രീതിയിൽ നട്ടുപിടിപ്പിക്കാറുണ്ട്. മഞ്ഞൾ നമുക്കെല്ലാവർക്കും സുപരിചിതമാണെങ്കിലും പുതുതലമുറയ്ക്ക് അത്ര കേട്ടുകേൾവിയില്ലാത്ത ഒന്നായിരിക്കും കസ്തൂരി മഞ്ഞൾ. ധനുമാസത്തിലെ തിരുവാതിര നാളിൽ നോമ്പ് എടുക്കുമ്പോൾ കസ്തൂരി മഞ്ഞളും കച്ചൂരി മഞ്ഞളും വേപ്പിലയും എല്ലാം അരച്ച് തേച്ച് കുളിക്കണമെന്ന് പഴമക്കാർ പറയുന്നത് കേട്ടിരിക്കും. നല്ല സുഗന്ധം വമിക്കുന്ന കസ്തൂരി മഞ്ഞളിന് നിരവധി ഗുണങ്ങളാണ് അടങ്ങിയിരിക്കുന്നത്. അറിയാം..
കസ്തൂരി മഞ്ഞളിന് കർപ്പൂരത്തിന്റേതു പോലെയുള്ള സുഗന്ധമാണുള്ളത്. നിരവധി ആരോഗ്യ ഗുണങ്ങളാണ് കസ്തൂരി മഞ്ഞൾ പ്രദാനം ചെയ്യുന്നത്. ദിവസവും കസ്തൂരി മഞ്ഞൾ അരച്ച് കുളിക്കുകയാണെങ്കിൽ ത്വക്കിന് നിറം വർദ്ധിക്കും. കസ്തൂരി മഞ്ഞൾപൊടി ശുദ്ധമായ പനിനീരിൽ ചേർത്ത് ഇളക്കി മുഖത്ത് പുരട്ടുന്നത് മുഖകാന്തി വർദ്ധിപ്പിക്കുന്നതിനും മുഖക്കുരു അകറ്റുന്നതിനും ഏറെ സഹായകമാണ്.
ആന്റി ബാക്ടീരിയൽ, ആന്റിസെപ്റ്റിക് പ്രോപ്പർട്ടികൾ ധാരാളം അടങ്ങിയതാണ് കസ്തൂരി മഞ്ഞൾ. അതിനാൽ തന്നെ ത്വക്കിലുണ്ടാകുന്ന കറുത്ത പാടുകൾ ഇല്ലാതാക്കാനും, ചിക്കൻപോക്സ് മൂലം ഉണ്ടായ കലകൾ ഇല്ലാതാക്കാനും കസ്തൂരി മഞ്ഞൾ സഹായിക്കുന്നു. ഇതിനുപുറമെ എണ്ണമയമുള്ള ചർമ്മത്തിന് ഏറെ ഉത്തമമാണ് കസ്തൂരി മഞ്ഞൾ. ഇത് അരച്ച് മുഖത്തു പുരട്ടിയാൽ എണ്ണമയം കുറയ്ക്കാനും സെബം സന്തുലിതമാക്കാനും സഹായിക്കുന്നു.
