അമൃത്സർ: പഞ്ചാബിൽ മയക്കുമരുന്ന് കടത്താൻ ശ്രമിക്കുന്നതിനിടെ നാല് പേർ പിടിയിൽ. ഒമ്പത് ലക്ഷം രൂപ വിലമതിക്കുന്ന മൂന്ന് കിലോ ഹെറോയിനാണ് പിടികൂടിയത്. പഞ്ചാബ് പോലീസ് നടത്തിയ അന്വേഷണത്തിലാണ് അമൃത്സറിലെ ലോഹ്ഗഢിൽ നിന്നും മയക്കുമരുന്ന് സംഘത്തെ പിടികൂടിയത്. അമൃത്സർ സ്വദേശികളായ വിക്രംജീത് സിംഗ്, രഷ്പാൽ സിംഗ്, വാര്യം സിംഗ്, സഹിൽ കുമാർ എന്നിവരാണ് അറസ്റ്റിലായത്.
മയക്കുമരുന്ന് കടത്താൻ പ്രതികൾ ഉപയോഗിച്ചിരുന്ന വാഹനവും പോലീസ് പിടികൂടിയിട്ടുണ്ട്. അതിർത്തി മേഖലകൾ കേന്ദ്രീകരിച്ച് മയക്കുമരുന്ന് കടത്ത് നടക്കുന്നുണ്ടെന്ന രഹസ്യവിവരത്തിന്റെ അടിസ്ഥാനത്തിലാണ് പ്രദേശത്ത് പോലീസ് പരിശോധന നടത്തിയത്. പ്രതികൾക്കെതിരെ മുമ്പും ക്രിമിനൽ കേസുകളുണ്ടെന്ന് പോലീസ് കണ്ടെത്തിയിട്ടുണ്ട്.
ലഹരിക്കടത്തുമായി ബന്ധപ്പെട്ട് മറ്റ് ആർക്കെങ്കിലും പങ്കുണ്ടോയെന്ന് അന്വേഷിച്ചുവരികയാണെന്നും മയക്കുമരുന്ന് നൽകുന്ന വിതരണക്കാരെയും കൈകാര്യം ചെയ്യുന്നവരെയും കേന്ദ്രീകരിച്ച് അന്വേഷണം പുരോഗമിക്കുകയാണെന്നും പോലീസ് അറിയിച്ചു.