ആരാധകർ ആവേശത്തോടെ കാത്തിരിക്കുന്ന മലൈക്കോട്ടെ വാലിബനിലെ ആദ്യ ഗാനം പുറത്തിറങ്ങി. ‘പുന്നാര കാട്ടിലെ പൂവനത്തിൽ കൊണ്ടു പോകാം നിന്നെ’ എന്ന് തുടങ്ങുന്ന ഗാനമാണ് അണിയറ പ്രവർത്തകർ പുറത്തുവിട്ടിരിക്കുന്നത്. രാത്രിയുടെ പശ്ചാത്തലത്തിലുള്ള ഗാനം ഇതിനോടകം തന്നെ ആരാധകർ ഏറ്റെടുത്തു കഴിഞ്ഞു. വൈകുന്നേരം അഞ്ച് മണിക്കിറങ്ങിയ വീഡിയോ ഗാനം നിരവധി പേരാണ് ഇതുവരെ കണ്ടത്.
മലൈക്കോട്ടെ വാലിബന്റെ ആദ്യ ഗാനം പുറത്തുവിടുമെന്ന് നേരത്തെ മോഹൻലാൽ അറിയിച്ചിരുന്നു. പ്രശാന്ത് പിള്ളയാണ് സംഗീതം സംവിധാനം ചെയ്തിരിക്കുന്നത്. പി എസ് റഫീഖ് രചന നിർവഹിച്ച ഗാനം ശ്രീകുമാർ വാക്കിയിലും അഭയ ഹിരൺമയിയുമാണ് ആലപിച്ചിരിക്കുന്നത്. പഴയ സിനിമാ ഗാനങ്ങൾ ഓർമ്മയിലേക്ക് കൊണ്ടുവരുന്ന തരത്തിലാണ് ഗാനമൊരുക്കിയിരിക്കുന്നത്.
മലയാള സിനിമാ പ്രേക്ഷകർ ആവേശത്തോടെ കാത്തിരിക്കുന്ന ചിത്രമാണ് മലൈക്കോട്ടൈ വാലിബൻ. മോഹൻലാൽ – ലിജോ ജോസ് കൂട്ടുക്കെട്ടിൽ ഒരുങ്ങുന്ന ചിത്രത്തിന്റെ ടീസർ ഒരു കോടിയിലധികം പേരാണ് കണ്ടത്. മോഹൻലാലിന് പുറമേ സോണാലി കുൽക്കർണിയും ചിത്രത്തിൽ പ്രധാന വേഷത്തിൽ എത്തുന്നുണ്ട്. ഹരീഷ് പേരടി, കഥ നന്ദി, ഡാനിഷ് സെയ്ത്, മണികണ്ഠൻ ആർ ആചാരി, ഹരി പ്രശാന്ത് വർമ, രാജീവ് പിള്ള, സുചിത്ര നായർ എന്നിവരും ചിത്രത്തിൽ പ്രധാന കഥാപാത്രങ്ങൾ ചെയ്യുന്നു.
