കൊല്ലം: കൊല്ലത്ത് നവകേരളാ സദസ് ഇന്ന് നടക്കാനിരിക്കെ ചക്കുവള്ളി പരബ്രഹ്മക്ഷേത്രത്തിൽ മുഖ്യമന്ത്രി പിണറായി വിജയന്റെ പേരിൽ ഗണപതിഹോമം. മുഖ്യമന്ത്രിയുടെ പേരിൽ 60 രൂപ അടച്ചാണ് ഹോമം ന‌ടത്തിയത്. രസീതിന്റെ ചിത്രം സമൂഹമാദ്ധ്യമത്തിൽ പ്രചരിക്കുന്നുണ്ട്. ക്ഷേത്രത്തിന്‌ സമീപത്തെ കശുവണ്ടി ഫാക്ടറിയുടെ സമീപത്താണ് ഇന്ന് നവകേരളാ സദസ് നടക്കുന്നത്.
ചക്കുവള്ളി ക്ഷേത്ര മൈതാനത്ത് നവകേരളാ സദസ് നടത്തുന്നത് ഹൈക്കോടതി വിലക്കിയിരുന്നു. തുടർന്നാണ് നവകേരളാ സദസിന്റെ വേദി കശുവണ്ടി ഫാക്ടറിയുടെ സമീപത്തേക്ക് മാറ്റിയത്. ക്ഷേത്ര മൈതാനത്ത് നവകേരളാ സദസ് നടക്കുന്നത് ക്ഷേത്രത്തിന്റെ ആചാരങ്ങൾക്ക് തടസമാകുമെന്ന് ചൂണ്ടിക്കാട്ടി ഹൈക്കോടതി ഉത്തരവിറക്കിയിരുന്നു.
ഹിന്ദു ഐക്യവേദി ഭാരവാഹികളായ കൊല്ലം കുന്നത്തൂർ സ്വദേശി ജെ ജയകുമാർ, മൈനാഗപ്പള്ളി സ്വദേശി ഓമനക്കുട്ടൻ പിള്ള എന്നിവർ സമർപ്പിച്ച ഹർജിയിലാണ് ഹൈക്കോടതി ഉത്തരവിറക്കിയത്. നവകേരളാ സദസ് ക്ഷേത്ര മൈതാനിയിൽ നടത്താൻ ദേവസ്വം ബോര്‍ഡ് നൽകിയ അനുമതി റദ്ദാക്കി കൊണ്ടായിരുന്നു ഹൈക്കോടതി ഉത്തരവ്.
