പത്തനംതിട്ട: പോലീസ് സ്റ്റേഷനിലെ വാട്സ്ആപ്പ് ഗ്രൂപ്പിൽ ആത്മഹത്യാ ഭീഷണി. എസ്എച്ചഒയും റൈറ്ററും മാനസികമായി പീഡിപ്പിക്കുന്നുവെന്ന സിവിൽ ഓഫീസറിന്റെ സന്ദേശമാണ് പുറത്തുവന്നത്. പത്തനംതിട്ട കൊടുമൺ പോലീസ് സ്റ്റേഷനിലാണ് സംഭവം.
ഇന്നലെയാണ് പോലീസ് സ്റ്റേഷനിലെ വാട്സ്ആപ്പ് ഗ്രൂപ്പിൽ സന്ദേശം വന്നത്. എസ്എച്ച്ഒയുടെയും റൈറ്ററുടെയും ഭാഗത്തു നിന്നും നിരന്തരമായി മാനസിക പീഡനങ്ങൾ താൻ ഏറ്റുവാങ്ങുന്നുണ്ടെന്നായിരുന്നു സിവിൽ ഓഫീസറുടെ സന്ദേശത്തിൽ പറയുന്നത്. സ്റ്റേഷന് പുറത്തുള്ള ജോലികളും ഉദ്യോഗസ്ഥർ ചെയ്യിപ്പിക്കുന്നുണ്ടെന്നും ഇതിനിടെയിൽ അസുഖ ബാധിതനായപ്പോൾ ആശുപത്രി വരെ പോയത് ലീവായി ഉദ്യോഗസ്ഥർ രേഖപ്പെടുത്തിയെന്നും സന്ദേശത്തിൽ പറയുന്നു.
ഇത്തരത്തിൽ തന്നെ നിരന്തരമായി മാനസിക പീഡനത്തിന് വിധേയനാക്കുകയാണെന്നും അതിനാൽ താൻ ആത്മഹത്യ ചെയ്യനാൻ പോവുകയാണെന്നും ഇതിന്റെ ഉത്തരവാദി എസ്എച്ച്ഒയും റൈറ്ററുമായിരിക്കുമെന്നും സിവിൽ ഓഫീസർ ആത്മഹത്യാ ഭീഷണിയിൽ പറഞ്ഞു. തുടർന്ന് മൊബൈൽഫോൺ സ്വിച്ച്ഓഫ് ആക്കിയ സിവിൽ ഓഫീസറിന്റെ ടവർ ലൊക്കേഷൻ പരിശോധിച്ച് വീട്ടിലെത്തിയ ഉദ്യോഗസ്ഥർ ഇദ്ദേഹത്തെ അനുനയിപ്പിക്കാൻ ശ്രമിച്ചു. സംഭവത്തിൽ ഉടനടി റിപ്പോർട്ട് നൽകാൻ എസ്പി നിർദ്ദേശവും നൽകിയിട്ടുണ്ട്.
