അവ്ൻ ഉണ്ടെങ്കിൽ മാത്രമാണ് കേക്ക് ഉണ്ടാകാൻ കഴിഞ്ഞിരുന്നുള്ളൂവെന്ന കാലമൊക്കെ മാറി. ഫ്രൈപാനിലും കുക്കറിലും വരെ കേക്കുണ്ടാക്കുന്ന കാലമാണിത്. ക്രിസ്മസ് പടിവാതിൽക്കൽ എത്തി നിൽക്കുന്ന വേളയിൽ ക്രിസ്മസ് മധുരം കട്ട വെറൈറ്റിയിലായാലോ? കുക്കറിൽ പഞ്ഞി പോലൊരു വാനില കേക്ക് ഉണ്ടാക്കാം.
ചേരുവകൾ
- മൈദ- ഒന്നര കപ്പ്
- ബേക്കിംഗ് പൗഡർ- രണ്ട് ടീസ്പൂൺ
- ഉപ്പ്-കാൽ ടീസ്പൂൺ
- മുട്ട- മൂന്നെണ്ണം
- പഞ്ചസാര-ഒരു കപ്പ്
- സൺഫ്ളവർ ഓയിൽ- അര കപ്പ്
- വാനില എസൻസ്- ഒരു ടീസ്പൂൺ
- പാൽ- അര കപ്പ്
തയ്യാറാക്കുന്ന വിധം
- മൈദ, ബേക്കിംഗ് പൗഡർ, ഉപ്പ് എന്നിവ അരിപ്പയിൽ അരിച്ചെടുക്കുക. രണ്ടോ മൂന്നോ തവണ അരിച്ചെടുക്കാൻ ശ്രദ്ധിക്കണം.
- പഞ്ചസാരയും മുട്ടയും ബീറ്റ് ചെയ്തെടുക്കുക. അല്ലെങ്കിൽ മിക്സിയിൽ അടിച്ചെടുക്കാവുന്നതാണ്. നന്നായി പതഞ്ഞ് ശേഷം ഓയിലും വാനില എസൻസും ചേർത്തു കൊടുക്കുക. വീണ്ടും മിക്സ് ചെയ്തെടുക്കുക.
- അരിച്ചെടുത്ത കൂട്ട് ഇതിലേക്ക് ചേർത്ത് കൊടുക്കുക. ഇതിലേക്ക് പാൽ ചേർക്കുക.
കേക്ക് ബേക്ക് ചെയ്യാനായി
- കുക്കറിൽ എണ്ണ തടവി കൊടുക്കുക. അടിയിലും വശങ്ങളിലും നന്നായി എണ്ണ തേയ്ക്കുക. കേക്ക് ബേക്ക് ചെയ്യാനായി അലുമിനിയം കുക്കർ എടുക്കുന്നതാകും ഉചിതം. സ്റ്റീലിന്റെ കുക്കറാണെങ്കിൽ അടിയിൽ പിടിക്കാനുള്ള സാധ്യതയുണ്ട്.
- ബട്ടർ പേപ്പർ വെച്ചതിന് ശേഷം എണ്ണ തടവി കൊടുക്കുക.
- ഇതിലേക്ക് കേക്കിന്റെ ബാറ്റർ ഒഴിച്ച് കൊടുക്കുക.
- വിസിൽ മാറ്റി കുക്കറിന്റെ അടപ്പ് വെച്ച് അടയ്ക്കുക.
- അടുപ്പിൽ ഫ്രൈയിംഗ് പാൻ ചൂടാക്കുക. ഇതിന് മുകളിൽ കുക്കർ വെക്കുക. ആദ്യത്തെ ഒരു മിനിറ്റ് മീഡിയം തീയിൽ പാകം ചെയ്യുക. 40 മുതൽ 45 മിനിറ്റ് വരെ ചെറുതീയിൽ പാകം ചെയ്യുക.
- ആവി പുറത്തേക്ക് വന്നതിന് ശേഷം കുക്കർ തുറക്കുക.
- ചൂടാറിയ ശേഷം കേക്ക് പുറത്തെടുത്ത് മുറിച്ചെടുക്കാം.