റിപ്പബ്ലിക്ക് ദിനാഘോഷത്തിൽ പങ്കെടുക്കും; ക്ഷണിച്ചതിൽ പ്രിയ സുഹൃത്തും പ്രധാനമന്ത്രിയുമായ നരേന്ദ്രമോദിക്ക് നന്ദി: ഇമ്മാനുവൽ മാക്രോൺ

പാരീസ്: റിപ്പബ്ലിക്ക് ​ദിനാഘോഷത്തിൽ പങ്കെടുക്കാൻ എത്തുമെന്ന് അറിയിച്ച് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ. സമൂഹമാദ്ധ്യമത്തിൽ പങ്കുവെച്ച പോസ്റ്റിലാണ് മാക്രോൺ ഇത് പറഞ്ഞത്. പ്രധാനമന്ത്രിയെ സുഹൃത്തെന് അഭിസംബോധന ചെയ്തുകൊണ്ടായിരുന്നു മാക്രോണിന്റെ പോസ്റ്റ്. മാക്രോൺ പങ്കെടുക്കുമെന്ന് എലിസീ ഫ്രഞ്ച് പ്രസിഡൻഷ്യൽ കൊട്ടാരം ഇതിന് മുൻപ് സ്ഥിരീകരിച്ചിരുന്നു. ഇതിന് പിന്നാലെയാണ് മാക്രോൺ സ്വന്തം എക്സ് അക്കൗണ്ടിലൂടെ വിവരം പങ്കുവെച്ചത്.

പ്രിയ സുഹൃത്ത്  നരേന്ദ്രമോദി, ക്ഷണിച്ചതിന് നന്ദി, ഭാരതത്തിന്റെ റിപ്പബ്ലിക്ക് ദിനാഘോഷത്തിൽ പങ്കെടുക്കാൻ ഞാൻ നിങ്ങളോടൊപ്പം അവിടെയുണ്ടാകും

– മാക്രോൺ എക്സിൽ കുറിച്ചു.

Thank you for your invitation, my dear friend @NarendraModi. India, on your Republic Day, I’ll be here to celebrate with you!

— Emmanuel Macron (@EmmanuelMacron) December 22, 2023

യുഎസ് പ്രസിഡന്റ് ജോ ബൈഡനെയായിരുന്നു ആദ്യം റിപ്പബ്ലിക് ദിന ചടങ്ങിലേക്ക് ക്ഷണിച്ചിരുന്നത്. എന്നാൽ തിരഞ്ഞെടുപ്പ് തിരക്കുകൾ കാരണം എത്താൻ സാധിക്കില്ലെന്ന് അറിയിച്ചതോടെയാണ് മാക്രോണിനെ ക്ഷണിച്ചത്. ഇന്ത്യയും ഫ്രാൻസും തമ്മിൽ സുദൃഢമായ സുഹൃദ് ബന്ധമാണുള്ളത്. ജി20 ഉച്ചകോടിയ്‌ക്കായി ഈ വർഷം സെപ്റ്റംബറിൽ മാക്രോൺ ഇന്ത്യയിൽ എത്തിയിരുന്നു. ജൂലൈയിൽ നടന്ന ഫ്രാൻസിന്റെ ബാസ്റ്റിൽ ഡേ പരേഡിൽ പ്രധാനമന്ത്രി നരേന്ദ്രമോദിയായിരുന്നു മുഖ്യാതിഥി.