സോൾ: ഉത്തരകൊറിയയിൽ പട്ടിണി മൂലം ആളുകൾ മരിക്കുന്നതായി റിപ്പോർട്ടുകൾ പുറത്ത് വരുന്നതിനിടയിൽ അമിത വണ്ണം കുറയ്‌ക്കാൻ പുത്തൻ പരീക്ഷണവുമായി കിം ജോങ് ഉൻ. കുറഞ്ഞ കലോറി ബിയറാണ് കിം ഭരണകൂടം പുറത്തിറക്കിയത്. ഉത്തര കൊറിയയിൽ ബിയർ ഉപഭോഗം ആഗോള ശരാശരിയേക്കാൾ വളരെയധികം കൂടുതലാണ്.
സർക്കാർ ഉടമസ്ഥതയിലുള്ള മദ്യനിർമാണ കമ്പനിയാണ് കലോറി കുറഞ്ഞ ബിയർ പുറത്തിറക്കിയിരിക്കുന്നത്. ഇതിൽ പഞ്ചസാര കുറവാണെന്നാണ് പറയപ്പെടുന്നത്. ബിയറിന്റെ ഏറ്റവും പുതിയ പതിപ്പാണിതെന്ന് ഉത്തരകൊറിയൻ മാദ്ധ്യമമായ മോണിംഗ് സ്റ്റാർ റിപ്പോർട്ട് ചെയ്തു.
കിം ജോങ്ങിന്റെ ഭരണത്തിന് കീഴിൽ ആയിരക്കണക്കിന് കുടുംബങ്ങൾ പട്ടിണി മൂലം മരിക്കുന്നതായാണ് റിപ്പോർട്ട്.
എങ്കിലും ബിയറിനും അരി ഉപയോഗിച്ചുള്ള സോജു എന്ന പാനീയത്തിനും വൻ ഡിമാൻഡാണ്. രാജ്യത്ത് റൈസ് വൈൻ സോജു ആണ് സാധാരണയായി ഉപയോഗിക്കുന്നതെന്ന് പ്രമുഖ ടൂർ മാനേജർ റോവൻ ബെയർഡ് പറയുന്നു.പുരുഷന്മാരുടെ ഭാരം കൂടുന്നത് തടയാൻ കഴിയുന്ന കലോറി കുറഞ്ഞ ബിയറിന് ഇനി വലിയ ഡിമാൻഡാകും. ഇവിടെ പുരുഷന്മാർക്ക് ഓരോ മാസവും രണ്ട് ലിറ്റർ ബിയറിനാണ് ടോക്കണുകൾ ലഭിക്കുന്നതെന്നും ബെയർഡ് കൂട്ടിച്ചേർത്തു.
നേരത്തെ ഉത്തരകൊറിയൻ ഏകാധിപതി കരയുന്ന വീഡിയോ വൈറലായിരുന്നു. സ്ത്രീകളുടെ മുന്നിൽ പ്രസംഗിക്കുമ്പോൾ കണ്ണുനീർ തുടയ്‌ക്കുന്ന ദൃശ്യങ്ങളാണ് വ്യാപകമായി പ്രചരിച്ചത്. രാജ്യത്ത് ജനനനിരക്ക് കുറയുന്നത് തടയാൻ സ്ത്രീകളോട് കഴിയുന്നത്ര പ്രസവിക്കാൻ കിം ആഹ്വാനം ചെയതിരുന്നു. ഈ അവസരത്തിലായിരുന്നു കിം കണ്ണീർ പൊഴിച്ചത്.
