മീൻ വിഭവങ്ങളോട് മലയാളികൾക്ക് എന്നും ഒരു പ്രത്യേക ഇഷ്ടമാണ്. മീൻ കറിയായും, മീൻ പൊരിച്ചതായും, മീൻ തോരനായും അങ്ങനെ എത്രയെത്ര വിഭവങ്ങളാണ് ഓരോ ദിവസവും അടുക്കളയിൽ നിറയുന്നത്. മീനിനോടുള്ള പ്രിയം വർദ്ധിച്ചു വരുന്നതിനനുസരിച്ചു തന്നെ മത്സ്യങ്ങളിൽ രാസവസ്തുക്കൾ നിറച്ച് വരുന്നതും ഇപ്പോൾ പതിവായിരിക്കുകയാണ്. ഫോർമാലിൻ ചേർത്ത് വരുന്ന മീനുകൾ കഴിക്കുന്നത് ക്യാൻസർ പോലുള്ള മാരക രോഗങ്ങൾക്ക് കാരണമാകുന്നു. അപ്പോൾ ഫ്രഷ് മീനുകൾ എങ്ങനെ തിരഞ്ഞെടുക്കും? അതിനായി ചില പൊടിക്കൈകൾ പരീക്ഷിക്കാം..
ഫോർമാലിൻ ഉപയോഗിച്ചു വരുന്ന മീനുകളാണെങ്കിൽ ഇവയ്ക്ക് നിറവ്യത്യാസമുണ്ടോയെന്ന് പ്രത്യേകം ശ്രദ്ധിക്കണം. ഫോർമാലിൻ ഉപയോഗിച്ചു വരുന്ന മീനുകൾക്ക് സ്വഭാവിക മണമോ നിറമോ ഉണ്ടാവുകയില്ല. മീനിന്റെ മാംസത്തിൽ വിരൽ കൊണ്ടമർത്തുമ്പോൾ മാംസം കുഴിഞ്ഞു പോകുന്നുണ്ടെങ്കിൽ അവ ചീഞ്ഞ മീനാണ്. ഫ്രഷ് മീനുകളുടെ മാംസം ദൃഢതയുള്ളതായിരിക്കും. ഇതിനുപുറമെ ഫ്രഷ് മീനുകളുടെ കണ്ണുകൾ തെളിച്ചമുള്ളതും വൃത്തിയുള്ളതുമായിരിക്കും. കണ്ണുകൾ കുഴിഞ്ഞതും ഇളം നീല നിറത്തോടു കൂടിയുമുള്ളതാണെങ്കിൽ ഫോർമാലിന്റെ അംശം ഇതിൽ അടങ്ങിയിട്ടുണ്ട്. മത്സ്യത്തിന്റെ ചെകിള ചുവപ്പ് നിറത്തോടെയാണ് ഇരിക്കുന്നതെങ്കിൽ മീൻ നല്ലതാണെന്ന് മനസിലാക്കാം. അസഹ്യമായ ദുർഗന്ധം മീനിൽ നിന്നും വരുന്നുണ്ടെങ്കിൽ ചീഞ്ഞ മീനാണ് ഇതെന്ന് മനസിലാക്കുക.
ഫോർമാലിൻ അടങ്ങിയ മീനുകൾ വൃത്തിയായി കഴുകിയെടുക്കാൻ ശ്രദ്ധിക്കേണ്ടതാണ്. ഇതിന്റെ ചെതുമ്പൽ പൂർണമായും നീക്കം ചെയ്ത് ഉപ്പ് പുരട്ടി അൽപസമയം വച്ചതിനുശേഷം കഴുകിയെടുക്കാം. കടലമാവ് പുരട്ടി വച്ചതിനു ശേഷവും മീൻ കഴുകിയെടക്കാവുന്നതാണ്. മീനിന്റെ സ്വഭാവിക ഗന്ധം അനുഭവപ്പെടുന്നില്ലങ്കിൽ മത്സ്യം ചീഞ്ഞതാണെന്ന് മനസിലാക്കാം.
