തിരുവനന്തപുരം: തിരുവല്ലത്ത് ആത്മഹത്യ ചെയ്ത ഷഹാനയുടെ മൃതദേഹവുമായി ഫോർട്ട് പോലീസ് സ്റ്റേഷൻ ഉപരോധിച്ച് ബന്ധുക്കൾ. മൃതദേഹത്തിനൊപ്പം റോഡിൽ കിടന്നാണ് ഷഹാനയുടെ സഹോദരിയും ബന്ധുക്കളും പ്രതിഷേധിച്ചത്. ഷഹാനയുടെ ആത്മഹത്യയിൽ വിശദമായ അന്വേഷണം നടത്തുമെന്ന് പോലീസ് ഇവർക്ക് ഉറപ്പു നൽകിയതിനു പിനന്ാലെയാണ് ഇവർ ഉപരോധം അവസാനിപ്പിച്ചത്.
ഭർതൃമാതാവിന്റെ മാനസിക പീഡനത്തെ തുടർന്നാണ് യുവതി ആത്മഹത്യ ചെയ്തതെന്നാണ് ബന്ധുക്കളുടെ ആരോപണം. ഇന്നലെ വൈകീട്ടാണ് ഷഹാന ജീവനൊടുക്കിയത്. ഭർതൃമാതാവിന്റെ നിരന്തര പീഡനങ്ങൾ കാരണം കഴിഞ്ഞ കുറച്ചു മാസങ്ങളായി യുവതി സ്വന്തം വീട്ടിലായിരുന്നു. എന്നാൽ ഭർതൃവീട്ടിൽ നടന്ന ചടങ്ങിൽ യുവതി പങ്കെടുക്കാതിരുന്നതോടെ ഒന്നര വയസുള്ള കുഞ്ഞിനെ ഭർത്താവ് ബലമായി എടുത്തുകൊണ്ടുപോയിരുന്നു. ഇതിന് പിന്നാലെയാണ് യുവതി ജീവനൊടുക്കിയത്. ഭർതൃവീട്ടുകാർക്കെതിരെ കർശന നടപടിയാവശ്യപ്പെട്ടായിരുന്നു നാട്ടുകാരുടെയും ബന്ധുക്കളുടെയും പോലീസ് സ്റ്റേഷൻ ഉപരോധം.