വിനോദ സഞ്ചാരികളെ വരവേൽക്കാൻ കോടമഞ്ഞ് പുതച്ച് നിൽക്കുന്ന മലനിരകൾ കാണുമ്പോൾ തന്നെ പ്രത്യേക രസമാണ്. തിരക്കിട്ട നഗര ജീവിതത്തിൽ നിന്നും പ്രശാന്ത സുന്ദരമായ ഗ്രാമജീവിതം ആസ്വദിക്കാൻ ആഗ്രഹിക്കുന്നവരെ കാളിമലയും സ്വാഗതം ചെയ്യുന്നു. പേര് കേട്ട് മറ്റു സംസ്ഥാനങ്ങളിലേക്ക് ഈ മല തിരഞ്ഞ് പോകേണ്ടതില്ല. നമ്മുടെ കൊച്ചു കേരളത്തിലെ തിരുവനന്തപുരം ജില്ലയിലാണ് കാളിമല സ്ഥിതി ചെയ്യുന്നത്. കോടമഞ്ഞു പുതച്ച് വറ്റാത്ത കാളിതീർത്ഥവുമായി വിനോദസഞ്ചാരികളെ വരവേൽക്കുന്ന കാളിമലയെ കുറിച്ച് അറിയാം..
പ്രാചീനതയുടെയും വിശ്വാസത്തിന്റെ കണങ്ങൾ മഞ്ഞുപോല പൊഴിയുന്ന, മനോഹാരിത തുളുമ്പുന്ന മലയാണ് കാളിമല. തിരുവനന്തപുരം ജില്ലയിലെ വെള്ളറയ്‌ക്ക് സമീപമാണ് ഈ മല സ്ഥിതി ചെയ്യുന്നത്. സമുദ്ര നിരപ്പിൽ നിന്നും 3,000 അടി ഉയരത്തിരൽ നിൽക്കുന്ന ഈ മലയിലൂടെയുള്ള ട്രക്കിംഗ് ഏവർക്കും പുത്തൻ അനുഭൂതി പ്രദാനം ചെയ്യുന്നു. വിനോദ സഞ്ചാരികളെ പോലെ തന്നെ വിശ്വാസികളെയും കാളിമല സ്വാഗതം ചെയ്യുന്നുണ്ട്. പുരാതന കാലത്ത് നിർമ്മിച്ച മലമുകളിലെ ക്ഷേത്രത്തിൽ ഭദ്രകാളിയാണ് പ്രതിഷ്ഠ. ഇതിനുപുറമെ ഒരു ശാസ്താ ക്ഷേത്രവും അതിൽ ശിവനും, ഗണപതിയും, നാഗയക്ഷിയും ഉപദേവതകളെയും പ്രതിഷ്ഠിച്ചിരിക്കുന്നു. കാട്ടു വഴികളിലൂടെ നടന്നു നീങ്ങി വേണം മല ചവിട്ടാൻ. ശബരിമലയിലേതു പോലെ വ്രതാനുഷ്ഠാനങ്ങൾ എടുത്താണ് പലരും ഇവിടെ മലകയറാനായി എത്തുന്നത്. സ്ത്രീകൾ പൊങ്കാലയിടുന്ന ക്ഷേത്രം കൂടിയാണ് ഇവിടം. കാളിമലയിലേക്കുള്ള യാത്ര തികച്ചും സൗജന്യമാണെന്നതാണ് വിനോദസഞ്ചാരികളെ കൂടുതലായും ഇങ്ങോട്ട് ആകർഷിക്കുന്നത്. കോടമഞ്ഞിൽ കുളിച്ചു നിൽക്കുന്ന മലനിരകളിൽ ശുദ്ധമായ നീരുറവകൾ തൊട്ടറിഞ്ഞ്, ശുദ്ധമായ വായു ശ്വസിച്ചുള്ള ഒരു ശാന്ത സുന്ദരമായ ട്രക്കിംഗാണ് കാളിമല വിനോദ സഞ്ചാരികൾക്ക് പ്രദാനം ചെയ്യുന്നത്.
