അയോദ്ധ്യ: പ്രാണ പ്രതിഷ്ഠാ ചടങ്ങിനുള്ള ഒരുക്കങ്ങൾ അയോദ്ധ്യയിൽ അതിവേഗം പുരോഗമിക്കുകയാണ്. രാമക്ഷേത്രത്തിലേക്കുളള പാതകളുടെയും കെട്ടിടങ്ങുടെയും സൗന്ദര്യവത്കരണം പൂർത്തിയായി കഴിഞ്ഞു. രാമരാജ്യമെന്ന സങ്കൽപ്പത്തെ അടിസ്ഥാനമാക്കി നഗരത്തിലെ മുഴുവൻ കെട്ടിട്ടങ്ങളും വീടുകളും കുങ്കുമവർണ്ണത്തിലാക്കി മാറ്റിയിരിക്കുകയാണ് അയോദ്ധ്യ മുൻസിപ്പൽ കോർപ്പറേഷൻ. അയോദ്ധ്യയുടെ ഐക്യത്തിന്റെ പ്രതീകമാകുയാണ് കുങ്കുമ നിറം.
അയോദ്ധ്യ ഹനുമാൻഗഡ് ക്ഷേത്രത്തിലേക്കുളള പാതയിലും മാറ്റം പ്രകടമാണ്. കോർപ്പറേഷന്റെ നിർദ്ദേശപ്രകാരമുള്ള ഡിസൈൻ അനുസരിച്ച് എല്ലാം കെട്ടിടങ്ങളുടെയും മുൻഭാഗങ്ങളുടെ പുനർനിർമാണം പൂർത്തിയായി. പാതയ്ക്ക് ഇരുവശത്തും നിരന്ന് നിൽക്കുന്ന എല്ലാം കെട്ടിടങ്ങൾക്കും വീടുകൾക്കും കുങ്കുമനിറം നൽകി മനോഹരമാക്കിയിട്ടുണ്ട്. നഗരത്തെ പുനർനിർമിക്കുന്നതിന്റെ ഭാഗമായാണ് മുൻസിപ്പാലിറ്റി ഇത്തരം തീരുമാനം കൈക്കൊണ്ടത്.
ഇതോടെ അയോദ്ധ്യയിലെ മുഴുവൻ കെട്ടിടങ്ങൾക്കും ഒരേ രൂപവും ഭാവവും കൈവന്നു. മുൻപ് ഒരു വാഹനത്തിന് മാത്രം കഷ്ടിച്ച് കടന്നു പോകാവുന്ന തരത്തിലായിരുന്നു ഹനുമാൻഗഡ് ക്ഷേത്രത്തിലേക്കുള്ള പാത. രണ്ട് വശത്തുമുള്ള കടകളുടെ അനധികൃത കൈയേറ്റം കാരണം പ്രദേശത്ത് ഗതാഗതം ദുസ്സഹമായിരുന്നു. ഇന്ന് അതെല്ലാം ഒഴിപ്പിച്ച് റോഡിന്റെ വീതികൂട്ടി മനോഹരമാക്കിയിരിക്കുയാണ്.
