തിരുവനന്തപുരം: പുതുവത്സരാഘോഷങ്ങൾ കഴിയുന്നതോടെ സംസ്ഥാനത്ത് കൊറോണ കേസുകളിൽ ദിനംപ്രതി വൻ വർധനയുണ്ടാകാൻ സാധ്യതയെന്ന് ആരോഗ്യവകുപ്പ് . ആഘോഷങ്ങളിൽ മാസ്ക് നിർബന്ധമാക്കാനും നിർദ്ദേശം നൽകിയിട്ടുണ്ട്. രാജ്യത്ത് സ്ഥിരീകരിക്കുന്ന കൊറോണ കേസുകളിൽ പകുതിയോളം രോഗികൾ കേരളത്തിലായതിനാലാണ് ജാഗ്രതാ നിർദ്ദേശം നൽകിയിരിക്കുന്നത്.
കോവിഡ് കേസുകളിൽ ദിനം പ്രതി വലിയ വർധനയാണ് ഉണ്ടാകുന്നത്. ഇതിനോടൊപ്പം പുതുവർഷ ആഘോഷം കൂടി കഴിയുന്നതോടെ സംസ്ഥാനത്ത് കൊറോണ കേസുകളിൽ ഇനിയും വർധനയുണ്ടാകാനാണ് സാധ്യതയെന്ന കണക്കു കൂട്ടലിലാണ് ആരോഗ്യവകുപ്പ്. ഒമിക്രോണും ജെ എൻ വണ്ണും ഉയരുന്ന സാഹചര്യത്തിൽ അതീവ ജാഗ്രത പുലർത്തണമെന്നാണ് ആരോഗ്യവകുപ്പിന്റെ നിർദ്ദേശം.
ആളുകൾ ഒത്തുകൂടുന്ന ഇടങ്ങളിൽ മാസ്ക് നിർബന്ധമാക്കണമെന്നും നിർദ്ദേശത്തിൽ പറയുന്നുണ്ട്. കർണാടകയിൽ കൊറോണ സ്ഥിരീകരിച്ചാൽ ഏഴ് ദിവസത്തെ ഐസൊലേഷനും നിർബന്ധമാക്കിയിട്ടുണ്ട്. അതിനിടെ ഒമിക്രോൺ, ജെ എൻ വൺ വകഭേദത്തിന്റെ വ്യാപനം ഉയരുന്നതും ആശങ്കയുണ്ടാക്കുന്നു.
