കൊച്ചി: ട്രാഫിക് ബോധവത്കരണം ലക്ഷ്യമാക്കി കൊച്ചി സിറ്റി ട്രാഫിക് പോലീസ് അണിയിച്ചൊരുക്കിയ ഹ്രസ്വ ചിത്രം ശുഭയാത്രയ്ക്ക് ആശംസകൾ അറിയിച്ച് നടൻ മോഹൻലാൽ. മോഹൻലാലും ചിത്രത്തിന്റെ ഭാഗമാണ്. ലിറഷാണ് ചിത്രത്തിന്റെ തിരക്കഥയും സംവിധാനവും നിർവ്വഹിച്ചിരിക്കുന്നത്. ഗുഡ് വിൽ എന്റർടൈൻമെന്റ്സിന്റെ യൂട്യൂബ് ചാനലിലൂടെയാണ് ശുഭയാത്ര പുറത്തുവിട്ടത്.
11 മിനിറ്റാണ് ചിത്രത്തിന്റെ ദൈർഘ്യം. ‘സിനിമയിലെ പോലെ യഥാർത്ഥ ജീവിതത്തിലും റീടേക്കുകൾ ഇല്ല’ എന്ന് മോഹൻലാൽ പറയുന്ന വാക്കുകളാണ് ചിത്രത്തിന്റെ ഇതിവൃത്തമായി കാണിച്ചിരിക്കുന്നത്. ഇന്ദ്രജിത്ത്, ബേസിൽ ജോസഫ് തുടങ്ങി നിരവധി താരങ്ങൾ ശുഭയാത്രയ്ക്ക് ആശംസകളുമായി എത്തിയിരുന്നു. ചവറ ഫിലിം സ്കൂളാണ് ചിത്രം നിർമ്മിച്ചിരിക്കുന്നത്. ഷിഖിൻ, വൈഗ, ഗോഡ്സൺ എന്നിവരാണ് ഹസ്വ ചിത്രത്തിലെ മറ്റ് അഭിനേതാക്കൾ.
