ബെംഗളൂരു: മംഗലാപുരത്തെ പ്രശസ്തമായ വജ്രദേഹി മഠം സന്ദർശിച്ച് കന്നട സിനിമാ താരം ഋഷഭ് ഷെട്ടി. വജ്രദേഹി ക്ഷേത്രത്തിലെ കോലയിൽ അദ്ദേഹം പ്രാർത്ഥനകളും പ്രത്യേക പൂജയും നടത്തി.
വജ്രദേഹി മഠത്തിലെ പുരോഹിതനായ രാജശേഖരാനന്ദ സ്വാമിജിയുടെ ക്ഷണപ്രകാരമായിരുന്നു ഋഷഭ് ക്ഷേത്രത്തിലെത്തിയത്. നേരത്തെ വജ്രദേഹി മഠം സന്ദർശിച്ച സമയത്ത് ക്ഷേത്രത്തിലെ പ്രധാന പുരോഹിതനായ രാജശേഖരാനന്ദ സ്വാമിജിയോട് മഠത്തിലെ പ്രതിഷ്ഠാ കോല കാണണമെന്ന് ഋഷഭ് ആഗ്രഹം പ്രകടിപ്പിച്ചിരുന്നു. തുടർന്നാണ് ഉത്സവത്തിലേയ്‌ക്ക് താരത്തിന് ക്ഷണം ലഭിച്ചത്. തന്റെ സ്വപ്ന ചിത്രം കാന്താര ചാപ്റ്റർ 1- ന്റെ ചിത്രീകരണത്തിനിടെയാണ് താരം ക്ഷേത്രത്തിലെത്തിയത്.
അതേസമയം കാന്താര ചാപ്റ്റർ 1- ന്റെ ചിത്രീകരണം ഉടുപ്പിയിൽ പുരോഗമിക്കുകയാണ്. കഴിഞ്ഞ നവംബറിലാണ് സിനിമയുടെ ചിത്രീകരണം ആരംഭിച്ചത്. ഇതിനോടകം സിനിമയുടെ ഒരു ടീസറും ഫസ്റ്റ് ലുക്ക് പോസ്റ്ററും പുറത്തുവന്നിരുന്നു. ഋഷഭ് ഷെട്ടി തിരക്കഥയെഴുതി സംവിധാനം ചെയ്ത് നായകനായെത്തിയ കാന്താരയുടെ ആദ്യം ഭാഗം കന്നട സിനിമാ ലോകത്തിന്റെ തന്നെ നാഴികകല്ലായി മാറിയിരുന്നു. ചിത്രത്തിന്റെ രണ്ടാം ഭാഗം വരുന്നെന്ന വാർത്തകൾ പ്രചരിച്ചതിന് പിന്നാലെ ആകാംക്ഷയോടെയാണ് ആരാധകർ കാത്തിരിക്കുന്നത്.
ബ്ലോക്ക്ബസ്റ്റർ വിജയം നേടിയ കാന്താര പൃഥ്വിരാജ് പ്രൊഡക്ഷൻസാണ് കേരളത്തിൽ എത്തിച്ചത്. ലിസ്റ്റിൻ സ്റ്റീഫന്റെ മാജിക് ഫ്രെയിംസ് ആണ് കാന്താരയുടെ വിതരണം നിർവഹിച്ചത്. കാന്താര എ ലെജന്റ് കന്നഡ, ഹിന്ദി, തമിഴ്, തെലുങ്ക്, മലയാളം, ബംഗാളി, ഇംഗ്ലീഷ് എന്നീ ഏഴ് ഭാഷകളിലായിരിക്കും റിലീസ് ചെയ്യുക. കാന്താര ലെജന്റിന്റെ അണിയറപ്രവർത്തകരെക്കുറിച്ചും താരങ്ങളെക്കുറിച്ചുമുള്ള ഒഫീഷ്യൽ അനൗൺസ്മെന്റിനായി കാത്തിരിക്കുകയാണ് സിനിമാലോകം.
