മുംബൈ: അഫ്ഗാനിസ്ഥാനെതിരായ ട്വന്റി 20 പരമ്പരയ്ക്കും ഇംഗ്ലണ്ടിനെതിരായ ടെസ്റ്റ് പരമ്പരയ്ക്കുമുള്ള ഇന്ത്യൻ ടീമിനെ ഇന്ന് പ്രഖ്യാപിച്ചേക്കുമെന്ന് റിപ്പോർട്ട്. ജൂൺ 1 മുതൽ അമേരിക്കയിലും വെസ്റ്റ് ഇൻഡീസിലുമായി നടക്കുന്ന ടി20 ലോകകപ്പിന്റെ ഭാഗമാകാൻ രോഹിത് ശർമ്മ വിരാട് കോലിയും താത്പര്യം പ്രകടിപ്പിച്ചതോടെയാണ് ടീം പ്രഖ്യാപനം വൈകിയത്. ഇരുവരും ചീഫ് സെലക്ടർ അജിത് അഗാർക്കറുമായി ചർച്ച നടത്തിയിരുന്നു. ദക്ഷിണാഫ്രിക്കയ്ക്കെതിരായ പരമ്പരയിൽ തിളങ്ങിയ മലയാളി താരം സഞ്ജു സാംസണും ടി20 ടീമിൽ തിരിച്ചെത്തുമെന്നാണ് ആരാധകർ പ്രതീക്ഷിക്കുന്നത്.
അതേസമയം ഈ മാസം 11ന് ആരംഭിക്കുന്ന ട്വന്റി 20 പരമ്പരയ്ക്കുള്ള ടീമിനെ അഫ്ഗാനിസ്ഥാൻ നേരത്തെ പ്രഖ്യാപിച്ചിട്ടുണ്ട്. ഇബ്രാഹിം സദ്രാൻ നയിക്കുന്ന ടീമിൽ മുജീബ് ഉർ റഹ്മാൻ, മുഹമ്മദ് നബി, നവീൻ ഉൽ ഹഖ് തുടങ്ങിയ പ്രമുഖ താരങ്ങൾ ഇടം നേടിയിട്ടുണ്ട്. പരിക്ക് ഭേദമാകാത്ത റാഷിദ് ഖാന് പരമ്പര നഷ്ടമാകും. 19 അംഗ ടീമിനെയാണ് അഫ്ഗാനിസ്ഥാൻ പ്രഖ്യാപിച്ചിരിക്കുന്നത്. മൂന്ന് മത്സരങ്ങളടങ്ങിയ പരമ്പരയിലെ രണ്ടാമത്തെ മത്സരം 14നും മൂന്നാം മത്സരം 17നും നടക്കും.
അഫ്ഗാനിസ്ഥാനെതിരായ ടി20 സാധ്യത ടീം
യശസ്വി ജയ്സ്വാൾ, രോഹിത് ശർമ്മ (സി), ശുഭ്മാൻ ഗിൽ, തിലക് വർമ്മ, വിരാട് കോലി, റിങ്കു സിംഗ്, ജിതേഷ് ശർമ്മ, ഇഷാൻ കിഷൻ, വാഷിംഗ്ടൺ സുന്ദർ, അക്സർ പട്ടേൽ, രവി ബിഷ്ണോയ്, കുൽദീപ് യാദവ്, അർഷ്ദീപ് സിംഗ്, മുകേഷ് കുമാർ, ദീപക് ചാഹർ, സഞ്ജു സാംസൺ.
