ന്യൂഡൽഹി: പ്രധാനമന്ത്രി നരേന്ദ്രമോദിക്കെതിരെ മാലിദ്വീപ് മന്ത്രിമാർ നടത്തിയ അധിക്ഷേപ പരാമർശങ്ങളിൽ ശക്തമായി പ്രതികരിച്ച് ബോളിവുഡ് താരം അക്ഷയ് കുമാർ. സമൂഹ മാദ്ധ്യമമായ എക്സിലൂടെയാണ് അദ്ദേഹം തന്റെ പ്രതികരണം അറിയിച്ചത്. എന്തിനാണ് ഇത്തരം വിദ്വേഷ പരാമർശങ്ങൾ ഇന്ത്യക്കാർ സഹിക്കുന്നതെന്നും അദ്ദേഹം എക്സിലൂടെ ചോദിച്ചു.
” ഇന്ത്യക്കാർക്കെതിരെ അധിക്ഷേപകരമായ പരാമർശങ്ങളാണ് മാലിദ്വീപിൽ നിന്നുള്ള പ്രമുഖരായ വ്യക്തികൾ ഉയർത്തിയത്. ഞാൻ ഒരുപാട് തവണ മാലിദ്വീപ് സന്ദർശിച്ചിട്ടുണ്ട്. ധാരാളം വിനോദസഞ്ചാരികളാണ് ഇന്ത്യയിൽ നിന്നും ഇവിടെ എത്തുന്നത്. അങ്ങനെയുള്ള രാജ്യത്തോടാണ് അവർ ഇത്തരം പരാമർശം നടത്തിയതെന്നത് എന്നെ ആശ്ചര്യപ്പെടുന്നു. എന്തിനാണ് ഇനിയും ഇത്തരം വിദ്വേഷ പരാമർശങ്ങൾ ഇന്ത്യക്കാർ സഹിക്കുന്നത്? നമ്മുടെ ടൂറിസം മേഖലയിൽ തന്നെ നിരവധി കാര്യങ്ങൾ കണ്ടെത്താനുണ്ട്. ഇന്ത്യൻ ടൂറിസം മേഖലയ്ക്കായി ഇനി നമുക്ക് പ്രവർത്തിക്കാം”- അക്ഷയ്കുമാർ കുറിച്ചു.
Came across comments from prominent public figures from Maldives passing hateful and racist comments on Indians. Surprised that they are doing this to a country that sends them the maximum number of tourists.
We are good to our neighbors but
why should we tolerate such… pic.twitter.com/DXRqkQFguN— Akshay Kumar (@akshaykumar) January 7, 2024
ബോളിവുഡ് താരം ജോൺ എബ്രഹാം അടക്കമുള്ള നിരവധി താരങ്ങളും ഇന്ത്യയ്ക്കെതിരെയുള്ള അധിക്ഷേപ പരാമർശത്തിൽ പ്രതികരിച്ച് രംഗത്തെത്തിയിരുന്നു. പ്രധാനമന്ത്രിയെയും ഭാരതത്തെയും അപകീർത്തിപെടുത്തിയ മന്ത്രിമാരെ മാലിദ്വീപ് സർക്കാർ സസ്പെൻഡ് ചെയ്തിട്ടുണ്ട്. മന്ത്രിമാരുടെ അഭിപ്രായം തികച്ചും വ്യക്തിപരമാണെന്നാണ് മാലിദ്വീപ് സർക്കാരിന്റെ നിലപാട്.